/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/8lk1S4z6pvkO1irQbB7d.jpg)
തിരുവനന്തപുരം: കാറില്‍ യാത്ര ചെയ്യുകയായിരുന്ന കോളേജ് അധ്യാപകനെയും മകനേയും വനം വകുപ്പ് ഉദ്യോഗസ്ഥന്‍ മര്‍ദിച്ചെന്ന് പരാതി. പാലോട് റെയ്ഞ്ച് ഓഫീസര്‍ ക്രൂരമായി മര്‍ദിച്ചെന്ന അധ്യാപകന്റെ പരാതിയില്‍ പൊലീസ് കേസെടുത്തു. പെരിങ്ങമ്മല ഇക്ബാല്‍ ട്രെയിനിങ് കോളേജ് അധ്യാപകന്‍ ഡോ. എ ബൈജുവിനെയും മകനെയുമാണ് പാലോട് റെയ്ഞ്ച് ഓഫീസര്‍ സുധീഷ് മര്‍ദിച്ചത്.
25 ന് പുലര്‍ച്ചെ കല്ലറയില്‍ നിന്നും പാലോട്ടേക്ക് വരുന്നതിനിടെയാണ് സംഭവം. മൈലമൂട് എത്തിയപ്പോള്‍ ആദ്യം രണ്ടുപേര്‍ കൈകാണിച്ചു. ഒറ്റപ്പെട്ട സ്ഥലവും താരതമ്യേന പേടി ഉളവാക്കുന്ന മൈലമൂട് സുമതിയെക്കൊന്ന വളവും ആയതിനാല്‍ അവിടെ കാര്‍ നിര്‍ത്തിയില്ലെന്ന് ബൈജു പറയുന്നു. തുടര്‍ന്ന് പാണ്ഡ്യന്‍ പാറ എത്തിയപ്പോള്‍ രണ്ടുപേര്‍ കൈകാണിച്ചു.
കാര്‍ നിര്‍ത്തിയപ്പോള്‍ ഫോറസ്റ്റ് ഉദ്യോഗസ്ഥരാണെന്ന് പരിചയപ്പെടുത്തി. ഇരുവരും ഔദ്യോഗിക വേഷത്തിലല്ലായിരുന്നു. ഇവര്‍ പുറത്തിറങ്ങാന്‍ ആവശ്യപ്പെട്ടെങ്കിലും ബൈജു പുറത്തിറങ്ങിയില്ല.
അവിടെനിന്ന് പാലോട് ഫോറസ്റ്റ് ഓഫീസിനു മുമ്പില്‍ എത്തിയപ്പോള്‍ വനം വകുപ്പിന്റെ ജീപ്പ് കാര്‍ തടഞ്ഞു. പുറത്തിറങ്ങിയപ്പോള്‍ ഞാന്‍ റെയ്ഞ്ച് ഓഫീസറാണ് എന്നുപറഞ്ഞ് സുധീഷ് ക്രൂരമായി മര്‍ദിക്കുകയായിരുന്നെന്ന് ബൈജു പറയുന്നു.
പിന്നീട് റെയ്ഞ്ച് ഓഫീസിനകത്ത് നിര്‍ത്തി അസഭ്യവര്‍ഷം പറയുകയും ഇരുവരെയും ക്രൂരമായി മര്‍ദിക്കുകയും ചെയ്തെന്നാണ് പരാതി. വനത്തില്‍ അതിക്രമിച്ചുകയറി എന്ന് വനംവകുപ്പ് കള്ളക്കേസെടുത്തെന്നും ബൈജു പറയുന്നു.
ഇദ്ദേഹത്തിന്റെ ചെവിക്കും കവിളെല്ലിനും പരിക്കുണ്ട്. പരിക്കേറ്റ അധ്യാപകനെ പാലോട് ആശുപത്രിയില്‍ പ്രാഥമിക ചികിത്സ നല്‍കിയ ശേഷം മെഡിക്കല്‍ കോളേജിലേക്കു മാറ്റുകയായിരുന്നു.
പൊലീസ് നടത്തിയ പരിശോധനയില്‍ വണ്ടിക്കുള്ളില്‍ നിന്ന് അസ്വാഭാവികമായി ഒന്നും കണ്ടെത്തിയില്ല. കോഴിക്കോട് ഒരു സ്ഥാപനത്തിന്റെ അഭിമുഖവുമായി ബന്ധപ്പെട്ട് മകന്റെ ചില ഔദ്യോഗിക രേഖകള്‍ മാത്രമാണ് ലഭിച്ചത്.
ഇതോടെ വനം വകുപ്പ് റെയ്ഞ്ച് ഓഫീസറുടെ പേരില്‍ കേസ് എടുത്തതായും അന്വേഷണം പുരോഗമിക്കുന്നതായും പൊലീസ് അറിയിച്ചു. വനംവകുപ്പ് ജീവനക്കാരുടെ മൊഴിയെടുത്തിട്ടുണ്ട്. വീഡിയോ ദൃശ്യങ്ങള്‍ കൂടി ശേഖരിച്ച ശേഷം തുടര്‍ നടപടികള്‍ സ്വീകരിക്കുമെന്നും പാലോട് പൊലീസ് അറിയിച്ചു.