ലാലു അലക്സ്, തുളസിദാസ്, പാലൊളി അബ്ദുൾ റഹ്മാൻ എന്നിവർക്ക് പ്രേംനസീർ സുഹൃദ്സമിതി പുരസ്ക്കാരങ്ങൾ

തിരുവനന്തപുരം: പ്രേംനസീറിന്റെ 37-ാം ചരമവാർഷികത്തോടനുബന്ധിച്ച് പ്രേംനസീർ സുഹൃത് സമിതിയുടെ ഈ വർഷത്തെ പുരസ്കാരങ്ങൾ പ്രഖ്യാപിച്ചു. പ്രേംനസീർ ലൈഫ് ടൈം അച്ചീവ്മെന്റ് പുരസ്കാരം നടൻ ലാലു അലക്സിന് ലഭിക്കും.

സംവിധാന ശ്രേഷ്ഠ പുരസ്കാരം സംവിധായകൻ തുളസിദാസിനും, സഹകരണ ബാങ്കിംഗ് ശ്രേഷ്ഠ പുരസ്കാരം കോഡൂർ സർവീസ് സഹകരണ ബാങ്ക് പ്രസിഡന്റ് പാലൊളി അബ്ദുൾ റഹ്മാനും, കഥാപുരസ്കാരം ശിവകൈലാസിനും, സാമൂഹ്യ സേവന പുരസ്കാരം മലയിൻകീഴ് പ്രേമനും സമ്മാനിക്കും.

ജൂറി ചെയർമാൻ സംവിധായകൻ ടി. എസ്. സുരേഷ് ബാബു വാർത്താസമ്മേളനത്തിലാണ് അവാർഡ് വിവരങ്ങൾ പ്രഖ്യാപിച്ചത്. ജനുവരി 15ന് വൈകിട്ട് 6 മണിക്ക് ഡെപ്യൂട്ടി സ്പീക്കർ ചിറ്റയം ഗോപകുമാർ പുരസ്കാരങ്ങൾ സമർപ്പിക്കും.

പ്രേംനസീർ സുഹൃത് സമിതി പാളയം ജിടെക് എഡ്യൂക്കേഷൻ സെന്ററുമായി സഹകരിച്ച് ‘നിത്യഹരിതം സർഗ്ഗവസന്തം’ എന്ന പേരിൽ ജനുവരി 11 മുതൽ 15 വരെ തൈക്കാട് ഭാരത് ഭവൻ മണൽപ്പരപ്പിൽ നസീർ അനുസ്മരണ പരിപാടികൾ സംഘടിപ്പിക്കും.

ശാർക്കര ദേവി ക്ഷേത്രത്തിന്റെ മാതൃകയിൽ രൂപകൽപ്പന ചെയ്ത ‘പ്രേംനസീർ കവല’ വേദിയിൽ പഴയ സിനിമാ ടാക്കീസ്, ചായപീടിക, ബാലുവിന്റെ ബോഞ്ചിക്കട, വായനശാല, ബാർബർ ഷോപ്പ്, തപാൽപെട്ടി, ഗ്രാമചന്ത, സൈക്കിൾ യാത്ര, റെക്കോർഡ് ഡാൻസ്, സാഹസിക പ്രകടനങ്ങൾ, ലേലംവിളി തുടങ്ങിയവ ഒരുക്കും.

എല്ലാ ദിവസവും വിവിധ കലാവിരുന്നുകളും ഉണ്ടായിരിക്കും. ഭാരത് ഭവൻ, എയ്റോ സീസ് കോളേജ് ഓഫ് ഏവിയേഷൻ, അണ്ടൂർക്കോണം റിപ്പബ്ലിക് ലൈബ്രറി എന്നിവയും പ്രേംനസീർ കവലയിലെ പ്രവർത്തനങ്ങളിൽ സഹകരിക്കും.

ജനുവരി 11ന് വൈകിട്ട് 5 മണിക്ക് അനുസ്മരണ സമ്മേളനവും പ്രദർശന ഉദ്ഘാടനവും അഡീഷണൽ അഡ്വക്കേറ്റ് ജനറൽ ജയചന്ദ്രൻ നായർ നിർവഹിക്കും. എം. എം. ഹസ്സൻ അധ്യക്ഷത വഹിക്കും.

വാർത്താസമ്മേളനത്തിൽ ജൂറി അംഗങ്ങളായ വഞ്ചിയൂർ പ്രവീൺ കുമാർ, വിനോദ്, സബീർ തിരുമല എന്നിവരും സമിതി ഭാരവാഹികളായ തെക്കൻ സ്റ്റാർ ബാദുഷ, പനച്ചമൂട് ഷാജഹാൻ എന്നിവരും പങ്കെടുത്തു.