ഇനി തടസങ്ങളില്ല. അങ്കമാലി-എരുമേലി ശബരി റെയിൽ പാതക്കായി സ്ഥലം ഏറ്റെടുക്കല്‍ അതിവേഗം. മലയോര മേഖലയിലെ റെയില്‍ കണക്ടിവിറ്റി കൊണ്ടുവരുക വൻ മാറ്റങ്ങൾ

കോട്ടയം: അങ്കമാലി-എരുമേലി ശബരി റെയില്‍വേ പാതക്കായി സ്ഥലം ഏറ്റെടുക്കല്‍ അതിവേഗം ഉണ്ടാകും. ഇന്നലെയാണ് സംസ്ഥാനത്തെ റെയില്‍വേ വികസനത്തില്‍ നിര്‍ണായകമായ അങ്കമാലി-എരുമേലി ശബരി റെയില്‍വേ പാതക്കായി 1,900 കോടി രൂപയുടെ പദ്ധതിക്ക് കിഫ്ബി അംഗീകാരം ലഭിച്ചത്.

ഇതോടെ ദശകങ്ങളായി മുടങ്ങിക്കിടക്കുന്ന ശബരി പദ്ധതിക്ക് വേഗത കൈവരുമെന്നാണ് പ്രതീക്ഷ. ഇനി ഭരണാനുമതിയുടെയോ മറ്റ് ഉത്തരവുകളുടേയോ ആവശ്യമില്ല.

അങ്കമാലി - എരുമേലി ശബരി റെയില്‍പാതയില്‍ ആകെയുള്ളത് 14 സ്റ്റേഷനുകളാണ്. ഇതില്‍ 7 എണ്ണം എറണാകുളം ജില്ലയില്‍, 2 എണ്ണം ഇടുക്കിയില്‍, 5 എണ്ണം കോട്ടയത്ത്. നിലവിലുള്ള എറണാകുളം - ഷൊര്‍ണൂര്‍ ലൈനില്‍ അങ്കമാലി ഫോര്‍ കാലടി റെയില്‍വേ സ്റ്റേഷനില്‍ നിന്നാണ് ശബരിപാത ആരംഭിക്കുന്നത്.

കാലടി, പെരുമ്പാവൂര്‍, ഓടക്കാലി, കോതമംഗലം, മൂവാറ്റുപുഴ, വാഴക്കുളം വഴി പാത ഇടുക്കി ജില്ലയില്‍ പ്രവേശിക്കും.

തൊടുപുഴ- (അങ്കമാലി റെയില്‍വേ സ്റ്റേഷനില്‍ നിന്ന് നിര്‍ദിഷ്ട ലൈന്‍ വഴിയുള്ള ദൂരം - 55 കിലോമീറ്റര്‍): ശബരി പാതയിലെ ഇടുക്കി ജില്ലയിലെ ആദ്യ സ്റ്റേഷന്‍. തൊടുപുഴ നഗരത്തിലെ കോലാനി - വെങ്ങല്ലൂര്‍ ബൈപാസിന് സമീപമാണ് സ്റ്റേഷന്‍. നഗരഹൃദയത്തില്‍ നിന്ന് 3 കിലോമീറ്റര്‍ മാത്രം അകലെയാണു സ്റ്റേഷന്‍. ഇടുക്കി ജില്ലയിലെ പ്രധാന സ്റ്റേഷനായി മാറേണ്ടതും തൊടുപുഴയാണ്.

തൊടുപുഴ സ്‌റ്റേഷനില്‍ നിന്നു പ്രധാന കേന്ദ്രങ്ങളിലേക്കുള്ള ദൂരം കണക്കാക്കിയാല്‍ മൂന്നാര്‍ കെഎസ്ആര്‍ടിസി ബസ് സ്റ്റാന്‍ഡ് - 80 കിലോമീറ്റര്‍, അടിമാലി - 58 കിലോമീറ്റര്‍, ഇടുക്കി ഡാം - 56 കിലോമീറ്ററുമാണ്.

എരുമേലിയില്‍ റെയില്‍വേ സ്റ്റേഷന്‍, എവിടെ വരുമെന്നതില്‍ ആകാംഷയുണ്ട്. ശബരി വിമാനത്താവള പദ്ധതിയില്‍ നിന്നു സര്‍ക്കാര്‍ പിന്‍മാറാത്തതിനാല്‍ വിമാനത്താവള പ്രദേശമായ ചെറുവള്ളിയില്‍നിന്ന് 5 - 8 കിലോമീറ്ററിനുള്ളില്‍ റെയില്‍വേ സ്റ്റേഷന്‍ വരാനാണ് സാധ്യത.

തിരുവനന്തപുരം നഗരത്തില്‍ മാത്രമാണ് ഇപ്പോള്‍ ഈ സൗകര്യമുള്ളത്. തിരുവനന്തപുരം രാജ്യാന്തര വിമാനത്താവളവും റെയില്‍വേ സ്റ്റേഷനും 5-6 കിലോമീറ്ററിനുള്ളിലാണ്.

എരുമേലി വിമാനത്താവളവുമായുള്ള റെയില്‍വേ കണക്ടിവിറ്റി വന്നാല്‍ ഇടുക്കി, കോട്ടയം, പത്തനംതിട്ട, ആലപ്പുഴ ജില്ലകള്‍ക്കും തമിഴ്‌നാട്ടിലെ കമ്പം, തേനി മേഖലകള്‍ക്കും പ്രയോജനപ്പെടും.