രാജീവ് ചന്ദ്രശേഖറിന്  ട്രെഡ്മില്ലിൽ നിന്ന് വീണ് പരിക്ക്, 'ട്രെഡ്മില്ലിൽ ഫോൺ ഉപയോഗിക്കുമ്പോൾ അതീവ ജാഗ്രത പാലിക്കുക' !

തിരുവനന്തപുരം:  സംസ്ഥാന ബിജെപി അധ്യക്ഷൻ രാജീവ് ചന്ദ്രശേഖറിന്  ട്രെഡ്മില്ലിൽ നിന്ന് വീണ് പരിക്കേറ്റു. പരിക്കേറ്റതിൻ്റെ ചിത്രങ്ങൾ അദ്ദേഹം തന്നെ ഫേസ്ബുക്കിൽ പങ്കുവെക്കുകയും സംഭവം തമാശയായി വിവരിക്കുകയും ചെയ്തു.

ഓടുന്നതിനിടെ ഫോൺ എടുക്കാൻ ശ്രമിക്കുന്നതിനിടെ ട്രെഡ്മില്ലിൽ നിന്ന് വീണാണ് അദ്ദേഹത്തിന് പരിക്കേറ്റതെന്നാണ് വിവരം. 

ട്രെഡ്മില്ലിൽ നിന്ന് വീണ് മുഖത്തും തലയിലുമുണ്ടായ ചതവുകളുടെ ചിത്രങ്ങൾ സഹിതം എക്‌സിലെ സോഷ്യൽ മീഡിയ പോസ്റ്റിലൂടെ ചന്ദ്രശേഖർ തന്നെയാണ് സംഭവം വെളിപ്പെടുത്തിയത്. അദ്ദേഹം തമാശ കലർന്ന രൂപത്തിലാണ് ഈ സംഭവം പങ്കുവെച്ചത്. പരിക്ക് ഗുരുതരമല്ല.

"അങ്ങനെ ഇന്ന് ഞാൻ വേദനയിലൂടെ ഒരു പാഠം പഠിച്ചു," അദ്ദേഹം കുറിച്ചു.

"നിങ്ങൾ ഒരു ട്രെഡ്മില്ലിൽ ഓടുമ്പോൾ റിംഗ് ചെയ്യുന്ന ഫോൺ എടുക്കാൻ ശ്രമിക്കുകയാണെങ്കിൽ - നിങ്ങൾ അശ്രദ്ധനാണെങ്കിൽ - വഴുതി വീഴാനും മുഖം ഉരയ്ക്കാനും അല്ലെങ്കിൽ പരിക്കേൽക്കാനും സാധ്യതയുണ്ട്," എന്ന് അദ്ദേഹം മുന്നറിയിപ്പ് നൽകി. ഇത് സ്വന്തം അനുഭവത്തിൽ നിന്നാണ് പറയുന്നതെന്നും അദ്ദേഹം കൂട്ടിച്ചേർത്തു.

"ഇതിന് തെളിവായി എനിക്ക് നാണക്കേടുണ്ടാക്കുന്ന വേദനയും പാടുകളുമുണ്ട്. കഥയിലെ ഗുണപാഠം: ട്രെഡ്മില്ലിൽ ഫോൺ ഉപയോഗിക്കുമ്പോൾ അതീവ ജാഗ്രത പാലിക്കുക," അദ്ദേഹം കുറിച്ചു. പോസ്റ്റിന് സാമൂഹ്യമാധ്യമങ്ങളിൽ നിന്ന് നിരവധി പ്രതികരണങ്ങളാണ് ലഭിച്ചത്.

സംഭവം എവിടെ വെച്ചാണ് നടന്നതെന്ന് അദ്ദേഹം പരാമർശിച്ചിട്ടില്ല. രാജീവ് ചന്ദ്രശേഖറിൻ്റെ വർക്കൗട്ട് സെഷനുകളുടെ നിരവധി ചിത്രങ്ങൾ നേരത്തെ സോഷ്യൽ മീഡിയ പ്ലാറ്റ്‌ഫോമുകളിൽ പ്രത്യക്ഷപ്പെട്ടിട്ടുണ്ട്.