ഗാന്ധിയെ വെട്ടി മാറ്റി തൊഴിലുറപ്പ് പദ്ധതി ഇല്ലാതാക്കാൻ സംഘ്പരിവാർ ശ്രമം - വെൽഫെയർ പാർട്ടി

തിരുവനന്തപുരം: മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയെ അട്ടിമറിക്കാനുള്ള കേന്ദ്രസർക്കാറിന്റെ ഗൂഢാലോചനയുടെ ഭാഗമാണ് പുതിയ തൊഴിലുറപ്പ് ഭേദഗതി ബില്ലെന്ന് വെൽഫെയർ പാർട്ടി സംസ്ഥാന പ്രസിഡണ്ട് റസാഖ് പാലേരി. പേരു വെട്ടി മാറ്റിയും പദ്ധതികളെ ഭേദഗതി ചെയ്തും രാജ്യത്തിൻ്റെ ചരിത്രത്തെ മായിച്ചു കളയാനാണ് സംഘ്പരിവാർ ലക്ഷ്യമിടുന്നത്.

വിബി ജി റാം ജി എന്ന തലക്കെട്ടോടെ പാർലമെൻ്റിൽ കേന്ദ്രമന്ത്രി ശിവരാജ് സിങ് ചൗഹാന്‍ അവതരിപ്പിച്ച ബില്‍ സംസ്ഥാന സർക്കാറുകളുടെ മേൽ വലിയ സാമ്പത്തിക ബാധ്യത സൃഷ്ടിക്കുന്നതാണ്. കടുത്ത കടകെണിയിൽ മുന്നോട്ട് പോകുന്ന വിവിധ സംസ്ഥാനങ്ങളെ കൂടുതൽ പ്രതിസന്ധിയിലേക്ക് ഇത് തള്ളിവിടും. ഗ്രാമസഭകളുടെയും പഞ്ചായത്തുകളുടെയും പങ്കാളിത്തം കുറച്ചു കൊണ്ടുവരുന്നതിനുള്ള അപകടകരമായ ഗൂഢാലോചന തൊഴിലുറപ്പ് ഭേദഗതി ബില്ലിൽ നടത്തിയിട്ടുണ്ട്. ഇതിനെതിരെ ശക്തമായ ജനകീയ പ്രക്ഷോഭം രൂപപ്പെടണമെന്ന് റസാഖ് പാലേരി പറഞ്ഞു.