സെക്രട്ടറിയേറ്റില്‍ പെഡസ്റ്റല്‍ ഫാന്‍ പൊട്ടിത്തെറിച്ചു. സംഭവത്തില്‍ ആര്‍ക്കും പരിക്കില്ല

തിരുവനന്തപുരം: സെക്രട്ടറിയേറ്റില്‍ പെഡസ്റ്റല്‍ ഫാന്‍ പൊട്ടിത്തെറിച്ചു. സെക്രട്ടറിയേറ്റിലെ നികുതി വകുപ്പിലെ ജെ സെക്ഷനിലാണ് ഫാന്‍ പൊട്ടിത്തെറിച്ചത്. ഫാനിന്റെ ഫൈബര്‍ ലീഫും ചിതറി തെറിച്ചു. സംഭവത്തില്‍ ആര്‍ക്കും പരിക്കില്ല. 

നേരത്തെ ഇതേ കെട്ടിടത്തിന് അടുത്തായി പാമ്പിനെ കണ്ടെത്തിയിരുന്നു. സെക്രട്ടറിയേറ്റില്‍ സുരക്ഷിതമായി ജോലി ചെയ്യാന്‍ സൗകര്യം ഒരുക്കണമെന്ന് ജീവനക്കാര്‍ ആവശ്യമുയര്‍ത്തിയിട്ടുണ്ട്.

മുമ്പ് ദര്‍ബാര്‍ ഹാള്‍ കെട്ടിടത്തിലെ ഓഫീസ് സീലീങ് തകര്‍ന്നു വീണ് അഡീഷണല്‍ സെക്രട്ടറിക്ക് പരിക്കേറ്റിരുന്നു. സെക്രട്ടറിയേറ്റ് അനക്സ് ഒന്നിലെ ശുചിമുറിയിലെ ക്ലോസറ്റ് തകര്‍ന്നുവീണ് ജീവനക്കാരിക്ക് പരിക്കേറ്റതും പ്രതിഷേധത്തിന് ഇടയാക്കി. 

കെട്ടിടത്തില്‍ അപകടങ്ങള്‍ തുടര്‍ക്കഥയാണെന്നും ആവശ്യത്തിന് അറ്റകുറ്റപ്പണികള്‍ നടക്കുന്നില്ലെന്നും ജീവനക്കാര്‍ ആരോപിച്ചിരുന്നു.