തലശ്ശേരിയിൽ പണിതീരാത്ത കെട്ടിടത്തിൽ കണ്ടെത്തിയ അസ്ഥികൂടം ഭാര്യയുടേതെന്ന് സമ്മതിച്ച് പെരിയ സ്വാമി. മദ്യലഹരിയിൽ മർദ്ദിച്ച ശേഷം കുഴിയിലിട്ട് കല്ലിട്ട് മൂടിയെന്നും പ്രതിയുടെ വെളിപ്പെടുത്തൽ. അസ്ഥികൂടം ധനകോടിയുടേതെന്ന് സ്ഥിരീകരിക്കാൻ ഡിഎൻഎ പരിശോധന

തലശ്ശേരി: പണിതീരാത്ത കെട്ടിടത്തിൽ നിന്ന് സ്ത്രീയുടെ അസ്ഥികൂടം കണ്ടെത്തിയ സംഭവത്തിൽ തമിഴ്‌നാട് സ്വദേശിയായ പെരിയ സ്വാമിയുടെ അറസ്റ്റ് രേഖപ്പെടുത്തി പൊലീസ്. മദ്യപാനവുമായി ബന്ധപ്പെട്ട തർക്കമാണ് കൊലപാതകത്തിനിടയാക്കിയതെന്നാണ് അന്വേഷണത്തിൽ നിന്ന് വ്യക്തമാകുന്നത്.

മദ്യലഹരിയിൽ ഭാര്യ ധനകോടിയെ മർദ്ദിച്ച ശേഷം കുഴിയിലേക്ക് തള്ളി കല്ലിട്ട് മൂടിയതായാണ് പ്രതിയുടെ മൊഴി. കണ്ടെത്തിയ അസ്ഥികൂടം ധനകോടിയുടേതാണെന്ന് സ്ഥിരീകരിക്കാൻ ഡിഎൻഎ പരിശോധന നടത്തും. ഇതിനായി മക്കളുടെ രക്തസാമ്പിളുകൾ പൊലീസ് ശേഖരിച്ചിരിക്കുകയാണ്.

പഴയ സാധനങ്ങൾ ശേഖരിച്ച് ഉപജീവനം നടത്തി വരികയായിരുന്ന ദമ്പതികൾ താമസിച്ചിരുന്ന സ്ഥലത്ത് നിന്നാണ് ധനകോടി ആറുമാസമായി കാണാതായത്. ‘നാട്ടിലേക്കാണ് പോയത്’ എന്നായിരുന്നു ഭർത്താവിന്റെ മറുപടി. എന്നാൽ നാട്ടിൽ ധനകോടിയെ കുറിച്ചൊരു വിവരവും ലഭിക്കാത്തതിനാൽ മക്കൾക്ക് സംശയം ശക്തമായി.

മക്കളുടെയും ബന്ധുക്കളുടെയും ആവർത്തിച്ച ചോദ്യംചെയ്യലിന് പിന്നാലെയാണ് അമ്പായിരം തലശേരിയിലേക്ക് വരാൻ അവരോട് ആവശ്യപ്പെട്ടത്. ഇവർ എത്തിയപ്പോൾ അസ്ഥികൂടം കണ്ടെത്തിയ സ്ഥലത്തെ നേരിട്ട് കാണിച്ചുകൊടുക്കുകയായിരുന്നുവെന്ന് പൊലീസ് പറഞ്ഞു. സാരിയുടെ അവശിഷ്ടവും ചെരുപ്പുകളും സ്ഥലത്ത് നിന്ന് കണ്ടെടുത്തിട്ടുണ്ട്.