രണ്ട് ദിവസം മുമ്പ് മോഷണം പോയ സ്വര്‍ണം തിരികെ വീട്ടില്‍ കൊണ്ടിട്ട നിലയില്‍. വീടിന് പുറത്ത് അലക്കാനുള്ള വസ്ത്രം സൂക്ഷിച്ച ബക്കറ്റില്‍ നിന്നുമാണ് സ്വര്‍ണം കണ്ടെത്തിയത്

കോഴിക്കോട്: രണ്ട് ദിവസം മുമ്പ് മോഷണം പോയ സ്വര്‍ണം തിരികെ വീട്ടില്‍ കൊണ്ടിട്ട നിലയില്‍. മുക്കം കാരശ്ശേരി സ്വദേശി കുമാരനല്ലൂര്‍ കൂടങ്ങരമുക്കില്‍ ചക്കിങ്ങല്‍ ഷെറീനയുടെ വീട്ടില്‍ ആണ് സംഭവം.

 വീടിന് പുറത്ത് അലക്കാനുള്ള വസ്ത്രം സൂക്ഷിച്ച ബക്കറ്റില്‍ നിന്നുമാണ് സ്വര്‍ണം കണ്ടെത്തിയത്. കഴിഞ്ഞ ശനിയാഴ്ച മോഷണം പോയ 30 പവന്‍ സ്വര്‍ണമാണ് കള്ളന്‍ തിരികെ കൊണ്ട് വെച്ചത്. ആയിരുന്നു.

ശനിയാഴ്ച രാത്രി എട്ട് മണിക്കും 10 മണിക്കും ആയിരുന്നു കുളങ്ങരമുക്കിലെ മോഷണം. ഷെറീനയും വീട്ടുകാരും ബന്ധു വീട്ടില്‍ പോയ നേരത്ത് ആയിരുന്നു മോഷണം നടന്നത്. 

ഷെറീനയുടെ മകള്‍ പ്രസവത്തിനായി വീട്ടിലെത്തിയിരുന്നു. മകളുടെ സ്വര്‍ണ്ണം വീട്ടിലെ അലമാരയില്‍ സൂക്ഷിച്ചിരുന്നു. ഈ സ്വര്‍ണ്ണമാണ് മോഷണം പോയത്. വീടിന്റെ ഓട് പൊളിച്ചിറങ്ങിയാണ് മോഷ്ടാവ് സ്വര്‍ണ്ണാഭരണങ്ങള്‍ കവര്‍ന്നത്.

സംഭവത്തിന് പിന്നാലെ ഷെറീന മുക്കം പൊലീസില്‍ പരാതി നല്‍കുകയും സംഭവം വാര്‍ത്തയാകുകയും ചെയ്തിരുന്നു. മുറിയിലെ അലമാരയുടെ ചുവട്ടില്‍ പെട്ടികളിലായി സൂക്ഷിച്ച 30 പവനോളം സ്വര്‍ണാഭരണമാണ് നഷ്ടമായത്. 

മുക്കം പോലീസ് കേസെടുത്ത് അന്വേഷണം നടത്തി വരികയായിരുന്നു  ഇതിന് പിന്നാലെയാണ് മോഷണം നടന്ന് നാല് ദിവസം കഴിഞ്ഞ് വീടിന് പുറത്തുനിന്നും നഷ്ടപ്പെട്ട 30 പവനും കണ്ടെത്തിയത്. ആരാണ് മോഷ്ടിച്ചതെന്നും പിന്നീട് തിരികെ കൊണ്ടുവന്നതെന്നും കണ്ടെത്താനുള്ള അന്വേഷണത്തിലാണ് പൊലീസ്. എന്തായാലും നഷ്ടപ്പെട്ട സ്വര്‍ണം തിരികെ കിട്ടിയ ആശ്വാസത്തിവാണ് ഷെറീനയും കുടുംബവും.