വെയിൽ കൊള്ളാതിരുന്നാൽ ശരീരത്തിനുണ്ടാകുന്ന പ്രശ്നങ്ങൾ ഇതൊക്കെയാണ്

പ്രായമേറിയവരെയും കുട്ടികളെയും വെയിലത്ത്​ നിൽക്കാനോ നടക്കാനോ വീട്ടിലുള്ളവർ അനുവദിക്കാറില്ല. ജലദോഷവും പനിയും പിടിക്കും എന്നായിരുന്നു നമ്മൾ കേട്ടുകൊണ്ടിരുന്ന​ മുന്നറിയിപ്പ്​. കാലം ചെന്നപ്പോൾ സ്വാഭാവികമായിത്തന്നെ ആരും വെയിലുകൊള്ളാതായി. കൃഷി കുറഞ്ഞതോടെ തുറസ്സായ സ്ഥലങ്ങളിൽനിന്നുള്ള ജോലികളും ഇല്ലാതായി.

ഭൂരിപക്ഷം വീടുകളിലും വാഹനങ്ങളായതോടെ പുറത്തിറങ്ങി നടക്കുന്നതും അപൂർവമായി. ഫ്ലാറ്റ്​-ഓഫിസ്​ സംസ്കാരം വ്യാപകമാ​യതോടെ വളരെ കുറച്ചുപേർ മാത്രമാണ്​ വെയിലുകൊണ്ട്​ ജോലിചെയ്യുന്നത്​. വെയിലുകൊണ്ടാൽ കറുത്തുപോകുമെന്നതിനാൽ ബാക്കിയുള്ളവർ ‘സൺസ്ക്രീൻ’ ലേപനങ്ങൾ പുരട്ടിയാണ്​ പേരിനെങ്കിലും വെയിലത്തേക്കിറങ്ങുന്നത്​.

വെയിൽ കൊള്ളാതിരിക്കുന്നതിലൂടെ ശരീരത്തിന് ആവശ്യമായ ‘ജീവകം-ഡി’യുടെ ലഭ്യത കുറയുകയും തുടർന്ന്​ പ്രമേഹം, ഹൃദയസംബന്ധമായ പ്രശ്നങ്ങൾ, തൈറോയ്ഡ് രോഗങ്ങൾ, ഫാറ്റി ലിവർ, എല്ലുകളുടെ ബലം കുറയൽ, സ്തനാർബുദം തുടങ്ങി പല രോഗങ്ങൾക്കും കാരണമാകുകയും ചെയ്യുന്നുണ്ട്​. നടുവേദന, പുറംവേദന, കഴുത്ത് വേദന, സന്ധിവേദന എന്നിവക്ക് കാരണവും ജീവകം-ഡിയുടെ കുറവാണ്.

ഗർഭിണികളിലാകട്ടെ ജീവകം-ഡിയുടെ കുറവ്​ നവജാത ശിശുവിന്‍റെ മസ്തിഷ്ക വളർച്ചയെവരെ ബാധിക്കാൻ സാധ്യതയുണ്ടെന്ന്​ ഗവേഷകർ മുന്നറിയിപ്പ്​ നൽകുന്നു. ​പ്രായമായവരിൽ കണ്ടുവരുന്ന ശരീരവേദനയുടെ കാരണം പലപ്പോഴും എല്ലുകളുടെ തേയ്മാനത്തിനു​ പുറമെ പേശികളുടെ ബലക്ഷയവുമാണ്​. ശരീരത്തിന്​ ലഭിക്കേണ്ട കാൽസ്യം ആവശ്യത്തിന്​ ലഭിക്കുന്നില്ല എന്നതാണ് ഇതിന്റെ അടിസ്ഥാനം.