കേന്ദ്ര സഹമന്ത്രി പദവി ലഭിച്ചതോടെ സുരേഷ് ​ഗോപിക്ക് മാറ്റമായോ? പോയി നിങ്ങടെ മുഖ്യമന്ത്രിയോട് ചോദിക്കൂ: പരാതിക്കാരിയോട് രോഷം പ്രകടിപ്പിച്ച് സുരേഷ് ഗോപി

തൃശൂർ:  പരാതിയുമായി മുന്നിലെത്തുന്നവരോടുള്ള സുരേഷ് ഗോപി എംപിയുടെ സമീപനം വീണ്ടും ചർച്ചയാകുന്നു. കരുവന്നൂർ ബാങ്കിൽ നിന്ന് സമ്പാദ്യം വീണ്ടെടുക്കാൻ സഹായം തേടിയ സ്ത്രീയോട് നിങ്ങളുടെ മുഖ്യമന്ത്രിയോട് ചോദിക്കാൻ പറഞ്ഞതോടെയാണ് സംഭവം വിവാദമായത്. തൃശൂരിൽ വോട്ടർമാരുമായി നടത്തിയ കൂടിക്കാഴ്ചയിലാണ് സംഭവം. പിന്നാലെ വീഡിയോ വൈറലാകുകയും അദ്ദേഹത്തിനെതിരെ വ്യാപക വിമർശനം ഉയരുകയും ചെയ്തു. 

തൻ്റെ ഭൂമി വിറ്റ ശേഷം സഹകരണ ബാങ്കിൽ പണം നിക്ഷേപിച്ചിരുന്നതായും എന്നാൽ ഇപ്പോൾ അത് പിൻവലിക്കാൻ കഴിഞ്ഞില്ലെന്നും ആനന്ദവല്ലി ഒരു സംഭാഷണത്തിനിടെ വിശദീകരിച്ചു. കൂടുതൽ വിശദീകരിക്കാൻ ശ്രമിച്ചപ്പോൾ, സുരേഷ്ഗോപി ഇടപെട്ട് വിഷയം മുഖ്യമന്ത്രിയെയോ സംസ്ഥാന ഉന്നത വിദ്യാഭ്യാസ മന്ത്രി ആർ ബിന്ദുവിനെയോ സമീപിക്കണമെന്ന് പറഞ്ഞു.

"എന്റെ നെഞ്ചിൽ കയറരുത് എന്നും പരാതിക്കാരിയോട് പറയുകയുണ്ടായി. "ഞാൻ നിങ്ങളുടെ മന്ത്രിയല്ല; ഞാൻ ഈ രാജ്യത്തിന്റെ മന്ത്രിയാണ്. ഇവിടെ അനുകമ്പയോ ദയയോ പ്രതീക്ഷിക്കരുത്, ഞാൻ വ്യക്തമായി സംസാരിക്കും." സുരേഷ് ​ഗോപി പറഞ്ഞു. ഇതോടെ മന്ത്രിയുടെ രൂക്ഷമായ പ്രതികരണം വ്യാപകമായ വിമർശനത്തിന് കാരണമായി. 

സമീപ ദിവസങ്ങളിൽ ഇത് രണ്ടാമത്തെ സംഭവമാണ്. നേരത്തെ, കൊടുങ്ങല്ലൂരിലെ കൊച്ചു വേലായുധൻ എന്ന വൃദ്ധന്റെ അപേക്ഷ ഗോപി അവഗണിച്ചതായി തോന്നിയതിനെ തുടർന്ന് വിമർശനം ഉയർന്നിരുന്നു. തകർന്നുകിടക്കുന്ന തന്റെ വീടിന്റെ മേൽക്കൂര നന്നാക്കാൻ സഹായം അഭ്യർത്ഥിക്കുകയായിരുന്നു അയാൾ. ഒരു എംപിയുടെ ജോലിയല്ല ഇതെന്ന് പറഞ്ഞുകൊണ്ട് സുരേഷ് ഗോപി കത്ത് തിരിഞ്ഞുനോക്കാതെ തിരിച്ചുവിട്ടു.

എന്നാൽ പിന്നീട് അദ്ദേഹം തന്റെ തെറ്റാണെന്ന് സമ്മതിക്കുകയും ചെയ്തു. തന്റെ അധികാര പരിധിക്കുള്ളിൽ മാത്രമേ ഞാൻ പ്രവർത്തിക്കൂ എന്നും ജനങ്ങൾ ഉന്നയിക്കുന്ന പ്രശ്നങ്ങൾ ആര് അസ്വസ്ഥരായാലും പരിഹരിക്കപ്പെടുമെന്നും സുരേഷ് ​ഗോപി പറഞ്ഞു.