റീലോഞ്ചുമായി ടെക്കികളുടെ സാംസ്കാരിക വേദിയായ 'ടെക് എ ബ്രേക്ക്'

'എറര്‍ 404-ക്രിയേറ്റിവിറ്റി ഫൗണ്ട്' എന്നതാണ് ടെക് എ ബ്രേക്ക് 2025 ന്‍റെ പ്രമേയം. ഐടി പ്രൊഫഷണലുകള്‍ക്ക് തങ്ങളുടെ സര്‍ഗ്ഗാത്മക കഴിവുകള്‍ മത്സരങ്ങളിലൂടെയും കലാപ്രകടനങ്ങളിലൂടെയും അവതരിപ്പിക്കാന്‍ അവസരം ഒരുക്കുന്നതാണ് പരിപാടി.

ഒരു ഇടവേളയ്ക്ക് ശേഷം 'ടെക് എ ബ്രേക്ക്' വീണ്ടും തുടങ്ങുന്നത് ഐടി സമൂഹത്തിന്‍റെ സര്‍ഗ്ഗാത്മകതയ്ക്ക് പുത്തനുണര്‍വ് പകരുമെന്ന് ടെക്നോപാര്‍ക്ക് സിഇഒ കേണല്‍ സഞ്ജീവ് നായര്‍ (റിട്ട) പറഞ്ഞു.

ടെക്കികളുടെ ബൗദ്ധികവും സര്‍ഗ്ഗാത്മവുമായ കഴിവുകള്‍ വളര്‍ത്തിയെടുക്കുകയാണ് ഇതുകൊണ്ട് ലക്ഷ്യമിടുന്നതെന്നും തിരക്കേറിയ ജോലി ഷെഡ്യൂളില്‍ നിന്ന് വിശ്രമവും വിനോദവും ഇതിലൂടെ ലഭ്യമാകുമെന്നും അദ്ദേഹം കൂട്ടിച്ചേര്‍ത്തു.

ഹാക്കത്തോണ്‍, ക്വിസ്, പെയിന്‍റിംഗ്, ടെക് പ്രേമികള്‍ക്കുള്ള സൈബര്‍ സെക്യൂരിറ്റി മത്സരമായ ക്യാപ്ചര്‍ ദി ഫ്ളാഗ്, ട്രഷര്‍ ഹണ്ട്, ഷോര്‍ട്ട് ഫിലിം, കോമഡി സ്കിറ്റ്, മ്യൂസിക് ബാന്‍ഡ്, ഫാഷന്‍ ഷോ, ഡാന്‍സ് തുടങ്ങി നിരവധി പരിപാടികളും മത്സരങ്ങളും ടെക് എ ബ്രേക്ക് 2025 ന്‍റെ ഭാഗമായി സംഘടിപ്പിച്ചിട്ടുണ്ട്. ടെക്നോപാര്‍ക്കിലെ വിവിധ കമ്പനികളിലെ ജീവനക്കാര്‍ക്ക് മത്സരങ്ങളില്‍ പങ്കെടുക്കാനും ഒരുമിച്ച് കൂടാനും ഇത് വേദിയാകും.

രജിസ്ട്രേഷന്‍ അടക്കമുള്ള വിശദാംശങ്ങള്‍ക്ക് https://techabreak.natana.in/ എന്ന വെബ്സൈറ്റ് സന്ദര്‍ശിക്കാം.

ഹാക്കത്തോണ്‍ ആണ് ഡിസംബര്‍ 23 ന് ആരംഭിക്കുന്ന ആദ്യ പരിപാടി. 2026 ഫെബ്രുവരി 6 ന് വിവിധ കമ്പനികളുടെ ടീമുകള്‍ അണിനിരക്കുന്ന ഗ്രാന്‍ഡ് ടാബ് ഘോഷയാത്രയോടെ ഗ്രാന്‍ഡ് ഫിനാലെയ്ക്കൊപ്പം ആഘോഷങ്ങള്‍ സമാപിക്കും.

ടെക്നോപാര്‍ക്കില്‍ നടന്ന ചടങ്ങില്‍ ടെക്ക് എ ബ്രേക്ക് 2025 ന്‍റെ ഔദ്യോഗിക പ്രഖ്യാപനവും ലോഗോ പ്രകാശനവും ടെക്നോപാര്‍ക്ക് സിഇഒ കേണല്‍ സഞ്ജീവ് നായര്‍ (റിട്ട) നിര്‍വ്വഹിച്ചു. ടെക്നോപാര്‍ക്ക് വൈസ് പ്രസിഡന്‍റ് (മാര്‍ക്കറ്റിംഗ് ആന്‍ഡ് കസ്റ്റമര്‍ റിലേഷന്‍ഷിപ്പ്) വസന്ത് വരദ, അസിസ്റ്റന്‍റ് വൈസ് പ്രസിഡന്‍റ് (അഡ്മിനിസ്ട്രേഷന്‍ ആന്‍ഡ് ഇന്‍ഡസ്ട്രിയല്‍ റിലേഷന്‍സ്) അഭിലാഷ് ഡി എസ്, ജി ടെക് സെക്രട്ടറി ശ്രീകുമാര്‍ വി, ജി ടെക് സിഇഒ ഈപ്പന്‍ ടോണി, ജി ടെക് മാനേജര്‍ അരുണ്‍ എസ് കുമാര്‍, ടാറ്റാ എല്‍ക്സിയിലെ നൈസില്‍ ബോസ്, ക്വാഡന്‍സ് ടെക്നോളജിയിലെ ജാനകി പ്രസന്ന, ട്രാവന്‍കൂര്‍ അനലിറ്റിക്സിലെ മുകേഷ് എസ് നായര്‍ എന്നിവര്‍ ചടങ്ങില്‍ പങ്കെടുത്തു.

കേരളത്തിലെ ഐടി കമ്പനികളുടെ കലാ-സാംസ്കാരിക-കായിക-ഐടി ക്ലബ്ബായ നടാന, ജി ടെക്, ടെക്നോപാര്‍ക്ക് എന്നിവയുടെ സംയുക്താഭിമുഖ്യത്തിലാണ് ടെക് എ ബ്രേക്ക് 2025 സംഘടിപ്പിക്കുന്നത്.