കോട്ടയം : യാക്കോബായ സഭയുടെ അധ്യക്ഷന്റെ വാഴിക്കല്‍ ചടങ്ങ് സഭ തര്‍ക്കത്തിലെ സുപ്രിം കോടതി വിധിയുടെ ലംഘനമാണെന്ന് ഓര്‍ത്തഡോക്‌സ് സഭ. മലങ്കരസഭയിലെ സമാധാനത്തിന് വിള്ളല്‍ വീഴ്ത്തുന്ന നീക്കമാണ് ഈ മാസം ലബനോനില്‍ നടക്കുമെന്ന് പറയപ്പെടുന്ന ബദല്‍ കാതോലിക്കാ വാഴിക്കല്‍ ചടങ്ങ്. ഈ സമാന്തരഭരണത്തെ ആശീര്‍വദിക്കാന്‍ നിയമ മന്ത്രിയടക്കം 7 പേരാണു സര്‍ക്കാര്‍ ചെലവില്‍ വിദേശത്തേക്ക് പോകുന്നത്.
ഭരണഘടനയോടുള്ള കൂറും വിധേയത്വവും പ്രഖ്യാപിച്ച് അധികാരമേറ്റവര്‍ രാജ്യത്തെ നിയമത്തെ കണ്ടില്ലെന്നു നടിക്കുന്നത് ഉന്നതമായ ജനാധിപത്യമൂല്യങ്ങളോടുള്ള അവഹേളനമായി മാത്രമേ കാണാന്‍ കഴിയൂ എന്ന് ഓര്‍ത്തഡോക്‌സ് സഭാ മാധ്യമവിഭാഗം തലവന്‍ ഡോ. യൂഹാനോന്‍ മാര്‍ ദീയസ്‌ക്കോറോസ് മെത്രാപ്പോലീത്ത വ്യക്തമാക്കി.
സമാന്തര ഭരണത്തിന് കോടതി അറുതി വരുത്തിയിട്ടും വീണ്ടും അധികാര കേന്ദ്രങ്ങള്‍ സ്ഥാപിക്കാന്‍ ശ്രമിക്കുന്നത് നീതിന്യായ വ്യവസ്ഥിതിയോടുള്ള വെല്ലുവിളിയാണ്. ഇത്തരം നിയമവിരുദ്ധ പ്രവര്‍ത്തനങ്ങളെ സംസ്ഥാന സര്‍ക്കാര്‍ പിന്തുണക്കുന്നതിലുള്ള പ്രതിഷേധം മലങ്കരസഭ രേഖപ്പെടുത്തി.
സംസ്ഥാനത്തെ നിയമമന്ത്രി തന്നെ നിയമലംഘനത്തിനു കൂട്ടുനില്‍ക്കുന്നുവെന്നത് ആശങ്കാജനകമാണ്. ഭാരതമെന്ന മതേതര രാജ്യത്ത് വോട്ടുബാങ്ക് രാഷ്ട്രീയം മാത്രം ലക്ഷ്യം വെച്ച് നടത്തുന്ന ഈ പരസ്യ പ്രീണനം പൊതുസമൂഹം തിരിച്ചറിയും. എറണാകുളത്തിനു പുറത്തുള്ള 13 ജില്ലകള്‍ കൂടി ചേരുന്നതാണു കേരളമെന്നു പ്രീണന രാഷ്ട്രീയ നേതൃത്വങ്ങള്‍ മറക്കരുത്.
സംസ്ഥാന സര്‍ക്കാരിന്റെ ധൂര്‍ത്തിനെതിരെ ദിവസേന പ്രതികരിക്കുന്നവരാണ് കേരളത്തിലെ പ്രതിപക്ഷം. തുച്ഛമായ വേതനത്തിനു വേണ്ടി തലസ്ഥാന നഗരിയില്‍ ആശാ വര്‍ക്കര്‍മാര്‍ നടത്തുന്ന സമരത്തെ പിന്തുണയ്ക്കുന്ന പ്രതിപക്ഷവും ചൂണ്ടിക്കാട്ടുന്നതു സര്‍ക്കാര്‍ ധൂര്‍ത്ത് ഒഴിവാക്കണമെന്നാണ്.
അങ്ങനെയെങ്കില്‍ പൊതു ഖജനാവിലെ ജനങ്ങളുടെ പണമെടുത്തു നിയമ വിരുദ്ധമായ ചടങ്ങില്‍ പങ്കെടുക്കാന്‍ സര്‍ക്കാര്‍ചെലവില്‍ പ്രതിനിധികളെ വിദേശത്തേക്ക് അയക്കുന്നതില്‍ പ്രതിപക്ഷത്തിന്റെ നിലപാട് എന്താണു വെയിലേറ്റ് തളര്‍ന്ന ആശമാരുടെ തലയ്ക്ക് മുകളിലൂടെയല്ലേ വിമാനത്തില്‍ യു.ഡി.എഫ് പ്രതിനിധികളടക്കം സ്വകാര്യചടങ്ങിനു പോകുന്നത്. ജനങ്ങളുടെ നികുതിക്കാശ് ഇതിനായി വിനിയോഗിക്കുന്നതിനെ പ്രതിപക്ഷവും പിന്തുണയ്ക്കുന്നുണ്ടോ എന്നറിയാന്‍ സഭ ആഗ്രഹിക്കുന്നു.
സഭയ്ക്ക് രാഷ്ട്രീയമില്ല. എല്ലാ രാഷ്ട്രീയപാര്‍ട്ടികളോടും സമദൂര നിലപാടാണ് എക്കാലത്തും സ്വീകരിച്ചിട്ടുള്ളത്. എന്നാല്‍ അത് മലങ്കര ഓര്‍ത്തഡോക്‌സ് സഭയുടെ ബലഹീനതയായി കാണരുതെന്നും ഡോ. യൂഹാനോന്‍ മാര്‍ ദീയസ്‌ക്കോറോസ് മെത്രാപ്പോലീത്ത പറഞ്ഞു. വൈദിക ട്രസ്റ്റി ഫാ.ഡോ.തോമസ് വര്‍ഗീസ് അമയില്‍, അല്‍മായ ട്രസ്റ്റി റോണി വര്‍ഗീസ് ഏബ്രഹാം, അസോസിയേഷന്‍ സെക്രട്ടറി ബിജു ഉമ്മന്‍, സഭാ വക്താവ് മലങ്കര മല്‍പ്പാന്‍ ഫാ.ഡോ.ജോണ്‍സ് ഏബ്രഹാം കോനാട്ട് റീശ് കോര്‍എപ്പിസ്‌കോപ്പാ എന്നിവര്‍ പങ്കെടുത്തു.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/03/13/kVJlk5gUSR3VPfzlbovA.jpg)