ജൈവമാലിന്യ സംസ്കരണത്തിൽ സംസ്ഥാനം നേടിയത് വലിയ പുരോഗതി; മുഖ്യമന്ത്രി പിണറായി വിജയൻ ബ്രഹ്‌മപുരം കംപ്രസ്ഡ് ബയോഗ്യാസ് പ്ലാന്റ് നാടിന് സമർപ്പിച്ചു

കൊച്ചി: ജൈവമാലിന്യ സംസ്കരണത്തിൽ സംസ്ഥാനം വലിയ പുരോഗതി നേടിയതായി മുഖ്യമന്ത്രി പിണറായി വിജയൻ. ഭാരത് പെട്രോളിയം കോർപറേഷൻ ലിമിറ്റഡ് (ബിപിസിഎൽ) ബ്രഹ്‌മപുരത്ത് പൂർത്തീകരിച്ച കംപ്രസ്ഡ് ബയോഗ്യാസ് പ്ലാന്റിന്റെ (സിബിജി) ഉദ്‌ഘാടനം ഓൺലൈനായി നിർവഹിക്കുകയായിരുന്നു അദ്ദേഹം. ആധുനിക രീതിയിലുള്ള പ്ലാന്റാണ് ബിപിസിഎൽ ബ്രഹ്‌മപുരത്ത് സ്ഥാപിച്ചത്.

വികേന്ദ്രീകരണ മാലിന്യ നിർമാർജന പ്രവർത്തനങ്ങൾക്ക് സർക്കാരിനൊപ്പം സഹകരിക്കുന്ന ബിപിസിഎല്ലിന്റെ നടപടികളെ മുഖ്യമന്ത്രി പ്രശംസിച്ചു. കേന്ദ്രമന്ത്രി സുരേഷ് ഗോപി അധ്യക്ഷത വഹിച്ചു. കേന്ദ്ര- സംസ്ഥാന സർക്കാരുകളുടെ കൂട്ടായ പ്രവർത്തനങ്ങളുടെ ഭാഗമായാണ് പ്ലാന്റ് യാഥാർഥ്യമായതെന്നും കേന്ദ്രത്തിന്റെ 'സ്വച്ഛ് ഭാരത്' പ്രവർത്തനങ്ങളുടെ സുപ്രധാന ചുവടുവെപ്പാണ് ബിപിസിഎല്ലിന്റെ കംപ്രസ്ഡ് ബയോഗ്യാസ് പ്ലാന്റെന്നും സുരേഷ് ഗോപി പറഞ്ഞു. ചടങ്ങിൽ മന്ത്രിമാരായ പി രാജീവ്, എം ബി രാജേഷ്, അഡ്വ. പി വി ശ്രീനിജൻ എംഎൽഎ, മേയർ അഡ്വ. മിനിമോൾ വി കെ, ഡെപ്യുട്ടി മേയർ ദീപക് ജോയ്, ബിപിസിഎൽ റിഫൈനറികളുടെ ഡയറക്ടർ സഞ്ജയ് ഖന്ന, കൊച്ചി റിഫൈനറി എക്സിക്യുട്ടിവ് ഡയറക്ടർ ചാക്കോ എം ജോസ് എന്നിവർ പ്രസംഗിച്ചു.

ചടങ്ങിൽ മാലിന്യ സംസ്കരണരംഗത്ത് സംസ്ഥാന സർക്കാർ കൈവരിച്ച നേട്ടങ്ങളെ പ്രതിപാദിക്കുന്ന കോഫി ടേബിൾ ബുക്ക് കേന്ദ്രമന്ത്രി സുരേഷ്‌ഗോപിക്ക് മന്ത്രിമാരായ പി രാജീവും എംബി രാജേഷും ചേർന്ന് കൈമാറി. ബ്രഹ്‌മപുരത്ത് സംസ്ഥാന സർക്കാർ ആരംഭിക്കുന്ന പ്രാദേശിക സാനിറ്ററി മാലിന്യ സംസ്കരണ കേന്ദ്രത്തിന്റെ നിർമാണോദ്ഘാടനം മന്ത്രി എംബി രാജേഷ് നിർവഹിച്ചു.