സംയോജിത ശിശുവികസന സേവന പദ്ധതി 50 വർഷങ്ങൾ പൂർത്തിയാക്കുന്നു. 50-ആം വാർഷികം ആഘോഷിക്കുന്നതിൻ്റെ ഭാഗമായുള്ള മന്ത്രി വീണാ ജോര്‍ജ് പ്രകാശനം ചെയ്തു

തിരുവനന്തപുരം: സംയോജിത ശിശുവികസന സേവന പദ്ധതിയുടെ 50-ആം വാർഷികം ആഘോഷിക്കുന്നതിൻ്റെ ഭാഗമായുള്ള ICDS@50 ലോഗോ ആരോഗ്യ വനിത ശിശുവികസന വകുപ്പ് മന്ത്രി വീണാ ജോര്‍ജ് പ്രകാശനം ചെയ്തു.

ജീവനക്കാരിൽ നിന്നും, പൊതുജനങ്ങളിൽ നിന്നും വകുപ്പിന്റെ സ്ഥാപനങ്ങളിലെ അന്തേവാസികളിൽ നിന്നും ലഭ്യമായ 70 ഓളം ലോഗോകളില്‍ നിന്നാണ് മികച്ച ലോഗോ തെരഞ്ഞെടുത്തത്. 

അന്തിമ പട്ടികയില്‍ 3 ലോഗോകളാണ് ഉള്‍പ്പെട്ടത്. ഈ മൂന്ന് ലോഗോകളിൽ നിന്നും വകുപ്പിന് കീഴിലെ തലശ്ശേരി ഗവ. ചിൽഡ്രൻസ് ഹോമിൽ താമസിക്കുന്ന കുട്ടി വരച്ചത് മികച്ച ലോഗോ ആയി മന്ത്രി വീണാ ജോര്‍ജ് തിരഞ്ഞെടുത്തു.

"കിളി കൊഞ്ചലുകളുടെ 50 ആണ്ട് " എന്ന ടാഗ് ലൈനും വാർഷികാഘോഷ പരിപാടിയുടെ ലോഗോയുടെ ഒപ്പം പ്രകാശനം ചെയ്യുന്നതിന് തിരഞ്ഞെടുത്തു.

2026 ജനുവരിയിൽ ഐ.സി.ഡി.എസ് അവാർഡ് വിതരണ പരിപാടികളോടെ ഒരു വർഷം നീണ്ടു നിൽക്കുന്ന സംയോജിത ശിശുവികസന സേവന പദ്ധതിയുടെ 50-ആം വാർഷിക ആഘോഷ പരിപാടികള്‍ക്ക് തുടക്കം കുറിക്കും.

വനിത ശിശുവികസന വകുപ്പ് ഡയറക്ടര്‍ ഹരിത വി കുമാര്‍, അഡീഷണല്‍ ഡയറക്ടര്‍ ബിന്ദു ഗോപിനാഥ്, ജോ. ഡയറക്ടര്‍ ശിവന്യ, പ്രോഗം ഓഫീസര്‍ ലജിന തുടങ്ങിയവര്‍ പങ്കെടുത്തു.