ഇ പി ജയരാജനെ പോലെ ഒരാളോട് ഇങ്ങനെ ചെയ്യാമോ? ജയരാജന്‍ പ്രകാശ് ജാവദേക്കറെ പോയി കണ്ടത് അദ്ദേഹത്തിന്റെ മാത്രം തീരുമാനത്തിലാകില്ലെന്ന് അരിയാഹാരം കഴിക്കുന്ന ആര്‍ക്കുമറിയാം; ജയരാജനെ കുറെ കാലമായി സിപിഎം ഒതുക്കുന്നു, പാര്‍ട്ടി പിന്തുണ നല്‍കിയില്ലെന്ന് തിരുവഞ്ചൂര്‍ രാധാകൃഷ്ണന്‍

തിരുവനന്തപുരം: ഇ പി ജയരാജനെ കുറെ കാലമായി സിപിഎം ഒതുക്കുകയാണെന്ന് മുതിര്‍ന്ന കോണ്‍ഗ്രസ് നേതാവ് തിരുവഞ്ചൂര്‍ രാധാകൃഷ്ണന്‍. ഇപിക്ക് പാര്‍ട്ടി പിന്തുണ നല്‍കിയില്ലെന്നും അദ്ദേഹം പറഞ്ഞു. ഇപി ജയരാജനെ കണ്‍വീനര്‍ സ്ഥാനത്ത് നിന്ന് നീക്കിയ നടപടിയില്‍ പ്രതികരിക്കുകയായിരുന്നു തിരുവഞ്ചൂര്‍. 

കുറേ കാലമായി അദ്ദേഹത്തെ പാര്‍ട്ടി ഒതുക്കുകയാണ്. എന്നാല്‍ അത് എന്നെക്കുറിച്ചല്ല എന്ന ഒരു മട്ടില്‍ കണ്ണടച്ച് നടക്കുകയായിരുന്നു ഇ പി.

ഓരോ സന്ദര്‍ഭത്തിലും നല്‍കേണ്ട പിന്തുണ പാര്‍ട്ടി അദ്ദേഹത്തിന് നല്‍കിയിട്ടില്ല. അദ്ദേഹത്തിന് കിട്ടുമെന്ന് പ്രതീക്ഷിച്ച പിന്തുണ എല്‍ഡിഎഫില്‍ നിന്നും കിട്ടിയിട്ടില്ല. 

ഇപ്പോള്‍ അതിന്റെ സ്വാഭാവിക പരിണാമമായ പുറത്താകുക എന്നതിലേക്ക് വന്നു. ഇ പി ജയരാജനെ പോലുള്ള ഒരാളോട് അങ്ങനെ ചെയ്യാമോയെന്ന ചോദ്യം സമൂഹത്തിന്റെ ഭാഗത്തില്‍ നിന്നുമുണ്ടെന്നും തിരുവഞ്ചൂര്‍ പറഞ്ഞു.

ബിജെപി നേതാവ് ജാവദേക്കറെ ഇ പി ജയരാജന്‍ പോയി കണ്ടത് അദ്ദേഹത്തിന്റെ മാത്രം തീരുമാനത്തിലാകില്ലെന്ന് അരിയാഹാരം കഴിക്കുന്ന ആര്‍ക്കുമറിയാമെന്നും തിരുവഞ്ചൂര്‍ ചൂണ്ടിക്കാട്ടി. തിരഞ്ഞെടുപ്പ് ഫലം വന്ന് ഇത്രയും കാലം കഴിഞ്ഞിട്ടാണ് ജയരാജനെ പൂര്‍വകാല പ്രാബല്യത്തോടെ പുറത്താക്കാന്‍ തീരുമാനമെടുത്തതെന്നും തിരുവഞ്ചൂര്‍ ചൂണ്ടിക്കാട്ടി.