ലഹരി പരിശോധനയ്ക്കിടെ എക്സൈസ് ഇന്‍സ്പെക്ടറെ കയ്യേറ്റം ചെയ്യാൻ ശ്രമിച്ച കടയുടമ അറസ്റ്റില്‍

തൃശൂര്‍: കുന്നംകുളത്ത് കടയില്‍ ലഹരി പരിശോധനയ്ക്കിടെ എക്സൈസ് ഇന്‍സ്പെക്ടറെ കയ്യേറ്റം ചെയ്യാൻ ശ്രമിച്ച യുവാവ് അറസ്റ്റില്‍. ചെമ്മന്തിട്ട സ്വദേശി എ എം നിധീഷിനെയാണ് പൊലീസ് അറസ്റ്റ് ചെയ്തത്. 

സംസ്ഥാനത്ത് ലഹരി വിരുദ്ധ പ്രവര്‍ത്തനങ്ങളുടെ  ഭാഗമായി എക്‌സൈസ് വകുപ്പ് പഴുന്നാന സ്‌കൂള്‍ പരിസരത്തെ നന്ദകുമാര്‍ എന്നയാളുടെ ഉടമസ്ഥതയിലുള്ള കടയില്‍ പരിശോധന നടത്തുന്നതിനിടെയാണ് നിധീഷ് എക്‌സൈസ് സംഘത്തിന്‍റെ ജോലി തടസപ്പെടുത്തുകയും എക്‌സൈസ് ഇന്‍സ്‌പെക്ടര്‍ കെ മണികണ്ഠനെ കൈയേറ്റം ചെയ്യാന്‍ ശ്രമിക്കുകയും ചെയ്തത്. 

യൂണിഫോമില്‍ കയറിപ്പിടിക്കുകയും അസഭ്യം പറഞ്ഞ് പിടിച്ചുതള്ളുകയും ചെയ്തതായി കെ മണികണ്ഠന്‍ കുന്നംകുളം പൊലീസിന് നല്‍കിയ പരാതിയില്‍ വ്യക്തമാക്കിയിട്ടുണ്ട്. എക്‌സൈസ് ഇന്‍സ്‌പെക്ടറുടെ പരാതിയെ തുടര്‍ന്നാണ് നിധീഷിനെ കുന്നംകുളം പൊലീസ് അറസ്റ്റ് ചെയ്തത്.