ഗതാഗതക്കുരുക്ക്: പാലിയേക്കരയിലെ ടോൾ പിരിവ് നിർത്തിവയ്ക്കാൻ കളക്ടറുടെ ഉത്തരവ്

തൃശ്ശൂർ: പാലിയേക്കരയിലെ ടോൾപിരിവ് താത്കാലികമായി നിർത്തിവെയ്ക്കാൻ ഉത്തരവിറക്കി തൃശൂർ ജില്ലാ കളക്ടർ അർജുൻ പാണ്ഡ്യൻ.  

യാത്രക്കാർക്ക് അനുബന്ധ സൗകര്യങ്ങൾ ഒരുക്കാതെ ടോൾ പിരിക്കുന്നതിലാണ് ജില്ലാ കളക്ടറുടെ കടുത്ത നടപടി. 

ദേശീയപാതയിലെ അടിപ്പാത നിർമാണം മൂലമുള്ള ഗതാഗതക്കുരുക്ക് ഒഴിവാക്കി സുഗമമായ ഗതാഗതം ഉറപ്പുവരുത്തും വരെ പാലിയേക്കരയിലെ ടോൾപിരിവ് നിർത്തിവെയ്ക്കണമെന്നാണ് ജില്ലാ കളക്ടർ ഉത്തരവിട്ടിരിക്കുന്നത്.

ഗതാഗതക്കുരുക്ക് ഒഴിവാക്കാൻ പോലീസിന്റെ സഹായത്തോടെ ആവശ്യമായ നടപടി അടിയന്തരമായി സ്വീകരിക്കാനും ദേശീയപാത അതോറിറ്റിക്ക് ജില്ലാ കളക്ടർ നിർദ്ദേശം നൽകി. 

ഉത്തരവ് ദേശീയ പാതാ അതോറിറ്റി പാലിക്കുന്നുണ്ടെന്ന് തൃശ്ശൂർ റൂറൽ ജില്ലാ പോലീസ് മേധാവി ഉറപ്പുവരുത്തണമെന്നും ഉത്തരവിൽ പറയുന്നു. സുഗമമായ ഗതാഗതസൗകര്യം ഉറപ്പായതിന് ശേഷം ഉത്തരവ് പുന:പരിശോധിക്കും.