തൃശൂരില്‍ നായയെ സ്‌കൂട്ടറിന് പിന്നില്‍ കെട്ടിവലിച്ച് കൊടുംക്രൂരത. നാട്ടുകാര്‍ തടഞ്ഞുനിര്‍ത്തി. വണ്ടി ഉപേക്ഷിച്ച് ഓടിരക്ഷപ്പെട്ട് യുവാവ്

തൃശൂർ: സ്‌കൂട്ടറിന് പിന്നിൽ നായയെ കെട്ടിവലിച്ച് കൊടുംക്രൂരത. നാട്ടുകാർ ഇടപെട്ട് നായയെ രക്ഷിച്ചു. കെട്ടിവലിച്ച യുവാവ് ബൈക്ക് ഉപേക്ഷിച്ച് ഓടി രക്ഷപ്പെട്ടു. തൃശ്ശൂർ തൈക്കാട്ടുശ്ശേരിയിൽ വൈകീട്ടാണ് സംഭവം. 

വല്ലച്ചിറ ഭാഗത്തുനിന്നും സ്‌കൂട്ടറിന്റെ പിറകിൽ കെട്ടിയ നിലയിൽ നായയെ വലിച്ചു കൊണ്ടുവരികയായിരുന്ന യുവാവിനെ തൈക്കാട്ടുശ്ശേരി സെന്ററിൽ വച്ച് ഒരു കൂട്ടം യുവാക്കൾ തടഞ്ഞു നിർത്തുകയായിരുന്നു.

ചോദ്യം ചെയ്യലിനിടയിൽ വണ്ടി ഉപേക്ഷിച്ച് യുവാവ് ഓടി രക്ഷപ്പെട്ടു. ഇയാൾക്കെതിരെ ഒല്ലൂർ പൊലീസിൽ പരാതി നൽകി.

മൃഗസ്‌നേഹിയായ ബിജു കപ്പറത്തിന്റെ നേതൃത്വത്തിൽ പോസ് പ്രവർത്തകരെത്തി നായയെ മണ്ണുത്തിയിലെ മൃഗാശുപത്രിയിലെത്തിച്ച് ചികിത്സ നൽകി.

മേലാസകലം ഉരഞ്ഞു പൊട്ടിയിട്ടുണ്ട്. ഒല്ലൂർ എസ് ഐ യുടെ നേതൃത്വത്തിൽ പൊലീസ് സ്ഥലത്തെത്തി വണ്ടി കസ്റ്റഡിയിൽ എടുത്തു. ഒളിവിൽ പോയ യുവാവ് തൈക്കാട്ടുശ്ശേരി സ്വദേശിയാണെന്ന് നാട്ടുകൾ പറഞ്ഞു.