തിരുവനന്തപുരം കിംസ് ഹെൽത്തിന്‍റെ ആഭിമുഖ്യത്തില്‍ മെറ്റേണൽ ഫീറ്റൽ മെഡിസിൻ വിദഗ്ദ്ധരുടെ അന്താരാഷ്ട്ര സമ്മേളനം 'ഫീറ്റോമാറ്റ് 2025'ന് തുടക്കമായി

തിരുവനന്തപുരം: ഇംഗ്ലണ്ടിലെ റോയൽ കോളേജ് ഓഫ് ഒബ്സ്ട്രിഷ്യൻസ് ആൻ്റ് ഗൈനക്കോളജിസ്റ്റുമായി സഹകരിച്ച് തിരുവനന്തപുരം കിംസ് ഹെൽത്ത് നടത്തുന്ന മെറ്റേണൽ ഫീറ്റൽ മെഡിസിൻ വിദഗ്ദ്ധരുടെ അന്താരാഷ്ട്ര സമ്മേളനമായ "ഫീറ്റോമാറ്റ്" തിരുവനന്തപുരത്ത് ആരംഭിച്ചു.

തിരുവനന്തപുരം കിംസിലെ മെറ്റേണൽ ആൻഡ് ഫീറ്റൽ മെഡിസിൻ വിഭാഗവും ഗൈനക്കോളജി വിഭാഗവും സംയുക്തമായാണ് സമ്മേളനം സംഘടിപ്പിക്കുന്നത്.

ശിശു ആരോഗ്യ രംഗത്തെ ഏറ്റവും പുതിയ മുന്നേറ്റങ്ങളെക്കുറിച്ചും ഹൈ റിസ്ക് ഗർഭധാരണ കേസുകളിൽ മൾട്ടി ഡിസിപ്ലിനറി പരിചരണത്തിന്റെ പങ്കും ഇന്നും നാളെയുമായി നടക്കുന്ന സെഷനുകളിൽ വിദഗ്ധ ഡോക്ടർമാർ ചർച്ച ചെയ്യും. 

ബ്രീഡിങ് ബിഗിനിങ് ആൻഡ് ബിയോൺസ് , എന്ന പ്രമേയത്തിൽ നടക്കുന്ന ഈ സമ്മേളനം ഗർഭധാരണത്തിനു മുൻപുള്ള ആസൂത്രണം ഗർഭകാല പരിചരണം പ്രസവാനന്തരമുള്ള അമ്മയുടെയും കുഞ്ഞിന്റെയും ആരോഗ്യം തുടങ്ങി സമഗ്ര ആരോഗ്യ പരിരക്ഷ ഉറപ്പാക്കുന്നതിന് ശ്രദ്ധ കേന്ദ്രീകരിച്ചിരിക്കുന്നു.

ഒക്ടോബർ 12 ന്  മെറ്റേണൽ ഫീറ്റൽ മെഡിസിൻ രംഗത്തെ സമകാലിക വെല്ലുവിളികളെക്കുറിച്ചും നൂതന കണ്ടുപിടിത്തങ്ങളെക്കുറിച്ചും 50 ഓളം വിദഗ്ധ സെഷനുകൾ അരങ്ങേറും.
 
ഓസ്ട്രേലിയയിലെ ന്യൂസൗത്ത് വെയ്ൽസ് ലിവർപൂൾ ഹോസ്പിറ്റലിലെ മെറ്റേണൽ മെഡിസിൻ ജോയിൻറ് പ്രൊഫസറായ ഡോക്ടർ ജോൺ സ്മോളേനിയേഖ്, ചെന്നൈ മെഡി സ്കാൻ വിദഗ്ധനുമായ ഇന്ത്യയിലെ പ്രശസ്ത ഫീറ്റൽ മെഡിസിൻ വിദഗ്ധനുമായ ഡോക്ടർ സുരേഷ് ഉൾപ്പെടെയുള്ളവർ തങ്ങളുടെ അനുഭവങ്ങൾ പങ്കുവയ്ക്കും. 

രാജ്യത്തിനകത്തുനിന്നും വിദേശത്തു നിന്നുമുള്ള പ്രമുഖ ആരോഗ്യ വിദഗ്ദ്ധരെ ഒരുമിപ്പിച്ച് പെരി നാറ്റോളജി മെഡിസിൻ രംഗത്തെ ഏറ്റവും പുതിയ അറിവുകൾ പങ്കുവെക്കുന്ന ഈ സമ്മേളനത്തിന് ആതിഥേയത്വം വഹിക്കുന്നതിൽ അഭിമാനമുണ്ടെന്ന് കിംസ് ഹെൽത്ത് ചെയർമാനും മാനേജിംഗ് ഡയറക്ടറുമായ ഡോക്ടർ എംഐ സഹദുള്ള പറഞ്ഞു. 

സമ്മേളനത്തിന്റെ ഭാഗമായി കേരളത്തിലെ സ്വകാര്യ മേഖലയിൽ ആദ്യത്തെ, പ്രസവകാല മാനസികാരോഗ്യ ക്ലിനിക്ക് ഉദ്ഘാടനം ചെയ്യും. ഗർഭിണികളായ അമ്മമാരുടെ മാനസികാരോഗ്യം മുൻനിർത്തി അവരുടെ വൈകാരിക ക്ഷേമത്തെ പിന്തുണയ്ക്കുന്നതിനാണ് കിംസ് ഹെൽത്ത് ക്ലിനിക് സജ്ജീകരിച്ചിരിക്കുന്നതെന്നും ഫീറ്റോമാറ്റ്2025 ന്റെ ഓർഗനൈസിംഗ് സെക്രട്ടറിയും കിംസ് ഹൈ റിസ്ക് പ്രെഗ്നൻസി ആൻഡ് പെരിനാറ്റോളജി വിഭാഗം സീനിയർ കൺസൾട്ടന്റുമായ ഡോക്ടർ വിദ്യാലക്ഷ്മി അഭിപ്രായപ്പെട്ടു. 

കേരളത്തിൽ ശിശു മരണ നിരക്ക് ആയിരത്തിൽ അഞ്ചായി കുറയ്ക്കുവാൻ സാധിച്ചിട്ടുണ്ട്. ഇത് വികസിത രാജ്യങ്ങൾക്ക് തുല്യമാണ്.

ഇന്ത്യയിൽ നിന്നും വിദേശത്തു നിന്നുമായി 150 ഓളം ആരോഗ്യ വിദഗ്ദ്ധർ തിരുവനന്തപുരത്ത് നടക്കുന്ന സമ്മേളനത്തിൽ പങ്കെടുക്കുന്നുണ്ട്.