സമരം ശക്തമാക്കാൻ ആശാ വർക്കർമാർ, കൂട്ട ഉപവാസം ഇന്ന് മുതൽ, പ്രതിഷേധത്തിന്റെ ഭാഗമായി ജില്ലാ കേന്ദ്രങ്ങളിലും പി എച്ച്സികളിലും വീടുകളിലും സ്ത്രീകൾ ഉപവാസമിരിക്കും

ആശാ വർക്കർമാരുടെ കൂട്ട ഉപവാസ സമരം ഇന്ന് മുതൽ. രാവിലെ 10 ന് ഡോ. പി. ഗീത സമരം ഉദ്ഘാടനം ചെയ്യും. പ്രതിഷേധത്തിന്റെ ഭാഗമായി ജില്ലാ കേന്ദ്രങ്ങളിലും പി എച്ച്സികളിലും വീടുകളിലും സ്ത്രീകൾ ഉപവാസമിരിക്കും.

 പൊതുപ്രവർത്തകരും സമരത്തിൻ്റെ ഭാഗമാകും. സെക്രട്ടേറിയറ്റിന് മുന്നിൽ നേരത്തെ ആരംഭിച്ച നിരാഹാര സമരം 5-ാം ദിവസത്തിലേക്ക് കടക്കുമ്പോഴാണ് സംസ്ഥാനതലത്തിൽ കൂട്ട ഉപവാസം കൂടി സംഘടിപ്പിക്കുന്നത്.

കേരള ആശാ ഹെൽത്ത് വർക്കേഴ്സ് അസോസിയേഷൻ ജനറൽ സെക്രട്ടറി എം.എ ബിന്ദു, ആശാ പ്രവര്‍ത്തകരായ കെ.പി തങ്കമണി, ശോഭ എം എന്നിവരാണ് സമരപ്പന്തലിൽ നിരാഹാരമനുഷ്ഠിക്കുന്നത്.

അതേസമയം, ഓണറേറിയം വർധന ഉൾപ്പെടെയുള്ള ആവശ്യങ്ങളുന്നയിച്ച് ആശാ പ്രവർത്തകർ നടത്തുന്ന അനിശ്ചിതകാല രാപ്പകൽ സമരം 43-ാം ദിവസത്തിലേക്ക് കടക്കുകയാണ്.