ഭാരതാംബയെ ഒഴിവാക്കുന്ന പ്രശ്നമില്ല. ദേശീയത, രാജ്യസ്നേഹം എന്നിവയില്‍നിന്ന് പിന്നോട്ടില്ല. ശിവന്‍കുട്ടി കാട്ടിയത് ഗുരുതര പ്രോട്ടോക്കോള്‍ ലംഘനം. ഗവര്‍ണര്‍ക്ക് മുന്നില്‍ സത്യപ്രതിജ്ഞ ചെയ്തവരെന്ന് മറക്കരുത്. മന്ത്രിയുടെ ഇറങ്ങിപ്പോക്ക് രാജ്ഭവന്‍ അതീവ ഗുരുതരമായി കാണുന്നു. ഭാരതാംബ 1947-ല്‍ ജനിച്ചതല്ലെന്നും ഭാരതാംബയെ മന്ത്രിക്ക് അറിയാത്തത് അപമാനമെന്നും ഗവര്‍ണര്‍. കേരളം കാണുന്നത് അസാധാരണ നടപടികള്‍

തിരുവനന്തപുരം: രാജ്ഭവനിലെ ചടങ്ങിൽ ഭാരതാംബയുടെ ചിത്രം വച്ചതിനെ ന്യായീകരിച്ചും സർക്കാരിനെയും മന്ത്രി വി.ശിവൻകുട്ടിയെയും കടന്നാക്രമിച്ചും ഗവർണർ രംഗത്തെത്തിയതോടെ സർക്കാർ- ഗവർണർ പോര് വീണ്ടും കടുത്തു.

ഭാരതാംബയെ ഒഴിവാക്കുന്ന പ്രശ്‌നമില്ലെന്ന് ഗവര്‍ണര്‍ പത്രക്കുറിപ്പിലൂടെ വ്യക്തമാക്കി. ദേശീയത, രാജ്യസ്‌നേഹം എന്നിവയിൽനിന്ന് പിന്നോട്ടില്ല. ഭാരതാംബയുടെ ചിത്രത്തിനു മുന്നില്‍ പുഷ്പാര്‍ച്ചന നടത്തി തൊഴുന്ന ഗവര്‍ണറുടെ ചിത്രവും രാജ്ഭവന്‍ പുറത്തുവിട്ടു. പരിപാടിയില്‍ മന്ത്രി വി.ശിവന്‍കുട്ടി പ്രസംഗിക്കുന്ന ചിത്രവും ഉള്‍പ്പെടുത്തിയിട്ടുണ്ട്.

ചടങ്ങുകളിൽ ഭാരതംഭയെ ഒഴിവാക്കേണ്ട സാഹചര്യമില്ലെന്നാണ് ഗവർണർ വ്യക്തമാക്കിയത്.  ഭാരതാംബയെ ഒഴിവാക്കേണ്ടതോ, ഉപേക്ഷിക്കേണ്ടതോ ആയ സാഹചര്യമൊന്നുമില്ല. ഭാരതാംബ എന്ന ആശയം രാജ്യസ്നേഹത്തിന്റെയും ദേശീയതയുടെയും അടിസ്ഥാനമാണ്. ഭാരതാംബ നമ്മിലെ പുതിയ തലമുറയിലേക്ക് ദേശീയവാദ മൂല്യങ്ങൾ വളർത്താൻ സഹായിക്കുന്നു - ഗവ‌ർണർ വ്യക്തമാക്കി.

രാജ്ഭവനിലെ ചടങ്ങിൽ മന്ത്രി വി.ശിവൻകുട്ടി ഗുരുതരമായ പ്രോട്ടോക്കോൾ ലംഘനവും ഗവർണറുടെ സ്ഥാനത്തോടുള്ള അവഹേളനവുമാണ് കാട്ടിയതെന്നും ഗവർണർ ചൂണ്ടിക്കാട്ടി. ഗവർണർ ഒരു ഭരണഘടനാപരമായ സ്ഥാനമാണ്. മന്ത്രിമാർ ഗവർണർക്ക് മുന്നി‌ൽ സത്യപ്രതിജ്ഞയെടുത്തിട്ടുള്ളവരാണ്. അത്തരം വ്യക്തികൾ സദസ്സ് വിട്ടിറങ്ങുന്നത് വ്യക്തിപരമായ അപമാനമാണ്.

ഭരണഘടനാപരമായ സ്ഥാനത്തോടുള്ള അവഗണനയുമാണ്. ഒരു പൊതു വേദിയിൽ, ഗവർണറോടൊപ്പം ഉള്ളവർക്ക് പോലും ഗവർണർ വേദി വിടുന്നതുവരെ തങ്ങളുടെ സാന്നിധ്യം നിലനിർത്തേണ്ടതാണ്. ഈ നിലയിൽ വിദ്യാഭ്യാസ മന്ത്രി ഇത്തരം മോശം മാതൃക കാഴ്ചവയ്ക്കുകയായിരുന്നു. മുൻകൂട്ടി തയ്യാറാക്കിയ പ്രസംഗവും കൊണ്ടാണ് മന്ത്രി  വേദിയിലെത്തിയതെന്നും ഗവർണർ ചൂണ്ടിക്കാട്ടി.

ഭാരതാംബയുടെ ചിത്രം പരിചിതമല്ല എന്ന് മന്ത്രി ജനങ്ങൾക്കുമുന്നിൽ വെളിപ്പെടുത്തിയത് കുട്ടികളോടും വിദ്യാര്‍ത്ഥികളോടുമുള്ള അപമാനമായി വിലയിരുത്തപ്പെടുന്നു. വളരെ കൃത്യതയോടെ പരിശീലിക്കപ്പെട്ട സ്കൗട്ട്സ്-ഗൈഡ്സിന്റെ മുന്നിലാണ് ഇത്തരമൊരു ‘പ്രകടനം’ നടന്നത്.

രാജ്ഭവൻ ഈ സംഭവത്തെ അതീവ ഗുരുതരമായി കാണുന്നു. ഇന്ന് നമ്മുടെ രാജ്യത്തിന് ഏറ്റവും പ്രധാനപ്പെട്ടത് ദേശസ്നേഹമാണ്. ഇക്കാലത്ത് നമ്മുടെ യുവാക്കൾക്ക് ശാസന കുറവാണ്. സ്കൂളുകളിൽ, കോളേജുകളിൽ, വിദ്യാഭ്യാസ സ്ഥാപനങ്ങളിൽ ഈ പോലുള്ള ശാസനാപഠനങ്ങൾ ആവശ്യമുണ്ട്. 

ദേശസ്നേഹവും ദേശീയതയും കുട്ടികളിൽ വളർത്തുന്നതിന് ഭാരതാംബ എന്ന ആശയമാണ് ആധാരമാകുന്നത്. ഇന്ത്യ എന്റെ രാജ്യമാണ്, എല്ലാവരും എന്റെ സഹോദരന്മാരും സഹോദരിമാരുമാണ് - ഈ സത്യം നമ്മെ ഭാരതാംബ എന്ന മാതാവിനോട് ബന്ധിപ്പിക്കുന്നു.

ഭാരതാംബ 1947-ൽ ജനിച്ചതല്ല. ആയിരക്കണക്കിന് വർഷങ്ങളായി നാം ഭാരതത്തിൽ ജീവിച്ചു വരികയാണല്ലോ. സ്വാതന്ത്ര്യം 1947-ൽ കിട്ടിയത് ബ്രിട്ടീഷ് ആധിപത്യത്തിൽ നിന്ന് മാത്രമാണ്. ആധുനിക ഇന്ത്യയുടെ ശാശ്വതമാക്കപ്പെട്ട മാതാവാണ് ഭാരതംബ. ഇന്നത്തെ പലർക്കും അതിനെക്കുറിച്ച് അറിയില്ല.

എന്നാൽ നിങ്ങൾ അറിയുന്നു. നിങ്ങൾ തന്നെയാണ് അതിന്റെ ഉത്തരം. ഭാരതാംബ ഞങ്ങൾ തന്നെ ആണ്. പ്രതീകാത്മകമായി, ഭാരതംഭയെ ആദരിച്ചു കൊണ്ടാണ് എല്ലാ പരിപാടികളും ആരംഭിക്കുന്നത്. നിങ്ങളുടെ സ്ഥാപനത്തിന്റെ പേരിൽ തന്നെ ‘ഭാരത്’ എന്നത് ഉണ്ട് (ഭാരത് സ്കൗട്ട്സ് ആൻഡ് ഗൈഡ്സ്).

അതിന്റെ അർത്ഥം നമുക്ക് മനസ്സിലാക്കണം. ഭാരതാംബയുടെ അനുഗ്രഹം നമ്മെ നന്മയുടെ വഴിയിൽ നയിക്കട്ടെ. ഭാരതാംബയെ ഒഴിവാക്കാനാവില്ല. എല്ലാ കാലത്തും, എല്ലായ്പ്പോഴും, എല്ലാ കാലത്തും ഭാരതാംബ നമ്മോടൊപ്പം ഉണ്ടാവണം.

ഇന്ത്യ, ഭാരതാംബ, ഭാരതീയത തുടങ്ങിയവ ആയിരക്കണക്കിന് വർഷങ്ങളായി ഉണ്ടായിരുന്നു. വാസ്കോഡ ഗാമ അടക്കം മറ്റു ആഗോള അതിക്രമണക്കാരും കേരളത്തിലെത്തിയത് ഈ ഭൂമി പിടിച്ചെടുക്കാനായിരുന്നു. എന്നാൽ പിന്നീട് അവർക്ക് തിരിച്ചു പോകേണ്ടി വന്നു.

ഇന്ന് ഈ ദേശത്തിന്റെ യഥാർത്ഥ ഉടമകൾ നമ്മളാണ്. നമ്മുടെ സ്വന്തം ഭൂപ്രദേശത്തെ ഭരിക്കുന്നത് ഭാരതാംബയുടെ പേരിലാണ്. അതാണ് സ്വാതന്ത്ര്യദിനത്തിൽ ലഭിച്ച മാറ്റം. ആ ദേശത്തിന്റെ ഒരു ഭാഗമാണ് നമ്മളെല്ലാം.

മഹാത്മാ ഗാന്ധിജിയും മറ്റ് സ്വാതന്ത്ര്യസമര സേനാനികളും ഭാരതാംബയോട് അവിശ്വസനീയമായ ആദരവു പുലർത്തിയിരുന്നു. ഇന്ന്, ചിലർ ചോദിക്കുന്നു: “ഭാരതാംബ ആരാണ് ?” എന്നാൽ ഉത്തരമോ ? നമ്മളാണ്. ഞങ്ങൾ തന്നെയാണ് ഭാരതാംബ. ഞങ്ങൾ ഭാരതമാണ്. വിദ്യാഭ്യാസ മന്ത്രി ചടങ്ങിൽ നിന്നു വിട്ടു നിൽക്കേണ്ടതില്ലായിരുന്നു. അദ്ദേഹം സ്കൗട്ട്സിന്റെ അദ്ധ്യക്ഷനാണ് - ഗവർണർ പറഞ്ഞു.