വർക്കലയിൽ വി. ജോയി തന്നെ; തിരുവനന്തപുരം ജില്ലാ സെക്രട്ടറിയുടെ താൽക്കാലിക ചുമതല എ.എ. റഹിമിന്

തിരുവനന്തപുരം: നിയമസഭാ തിരഞ്ഞെടുപ്പില്‍ വര്‍ക്കല മണ്ഡലത്തില്‍ സി.പി.എം സ്ഥാനാര്‍ത്ഥിയായി വി. ജോയി തന്നെ മത്സരിക്കും. ഇന്ന് ചേര്‍ന്ന സി.പി.എം സംസ്ഥാന സെക്രട്ടറിയേറ്റ് യോഗത്തിലാണ് ഈ സുപ്രധാന തീരുമാനമുണ്ടായത്.

നിലവില്‍ പാര്‍ട്ടി ജില്ലാ സെക്രട്ടറിയുടെ ചുമതല വഹിക്കുന്ന വി. ജോയി മത്സരരംഗത്തിറങ്ങുന്ന സാഹചര്യത്തില്‍, ജില്ലാ സെക്രട്ടറിയുടെ താല്‍ക്കാലിക ചുമതല രാജ്യസഭാ എം.പി എ.എ. റഹിമിന് നല്‍കാനും പാര്‍ട്ടി തീരുമാനിച്ചു.

ജില്ലാ നേതൃത്വത്തില്‍ എ.എ. റഹിം എത്തുമെന്ന് സത്യം ഓണ്‍ലൈന്‍ രണ്ട് ദിവസം മുന്‍പ് തന്നെ റിപ്പോര്‍ട്ട് ചെയ്തിരുന്നു. ഈ വാര്‍ത്ത ശരിവെക്കുന്ന തരത്തിലാണ് പാര്‍ട്ടിയുടെ ഇപ്പോഴത്തെ നീക്കം.

വര്‍ക്കല മണ്ഡലത്തില്‍ വി. ജോയിയുടെ ജനപ്രീതിയും സ്വാധീനവും കണക്കിലെടുത്താണ് അദ്ദേഹത്തെ തന്നെ വീണ്ടും മത്സരിപ്പിക്കാന്‍ പാര്‍ട്ടി തീരുമാനിച്ചത്.

വി. ജോയി തിരഞ്ഞെടുപ്പ് പ്രവര്‍ത്തനങ്ങളില്‍ കേന്ദ്രീകരിക്കേണ്ടി വരുന്നതിനാലാണ് ജില്ലാ സെക്രട്ടറിയുടെ ചുമതല എ.എ. റഹിമിന് കൈമാറിയത്. യുവനേതാവായ റഹിം എം.പി എന്ന നിലയിലുള്ള തന്റെ പ്രവര്‍ത്തനങ്ങള്‍ക്കൊപ്പം തന്നെ പാര്‍ട്ടിയുടെ ജില്ലാ ഭരണവും നിയന്ത്രിക്കും.

വര്‍ക്കലയില്‍ വി. ജോയി വിജയിക്കുകയാണെങ്കില്‍ എ.എ. റഹിം തന്നെ ജില്ലാ സെക്രട്ടറിയായി തുടരാനാണ് സാധ്യത. എന്നാല്‍, അപ്രതീക്ഷിതമായി ജോയി പരാജയപ്പെട്ടാല്‍ അദ്ദേഹം വീണ്ടും ജില്ലാ സെക്രട്ടറി സ്ഥാനത്തേക്ക് മടങ്ങി വരും.

തലസ്ഥാനത്തെ പാര്‍ട്ടി സംവിധാനത്തില്‍ വലിയ ചലനങ്ങളുണ്ടാക്കുന്ന തീരുമാനമാണിത്. വി. ജോയിക്ക് കീഴില്‍ പാര്‍ട്ടി സംവിധാനം ശക്തമാണെങ്കിലും, തിരഞ്ഞെടുപ്പ് വേളയില്‍ ഒരു മുഴുവന്‍ സമയ സെക്രട്ടറി വേണമെന്ന വിലയിരുത്തലിലാണ് റഹിമിനെ ചുമതലപ്പെടുത്തിയത്. റഹിമിന്റെ നേതൃപാടവം വരാനിരിക്കുന്ന തിരഞ്ഞെടുപ്പില്‍ പാര്‍ട്ടിയുടെ പ്രകടനം മെച്ചപ്പെടുത്താന്‍ സഹായിക്കുമെന്നും നേതൃത്വം കരുതുന്നു.

ജില്ലയിലെ സീറ്റുകള്‍ നിലനിര്‍ത്തുക എന്ന വലിയ ദൗത്യമാണ് ഇപ്പോള്‍ പുതിയതായി ചുമതലയേറ്റ എ.എ. റഹിമിന് മുന്നിലുള്ളത്.