“നിങ്ങൾ ബിഹാറിലേക്ക് ഉറ്റുനോക്കി ഇരിക്കട്ടെ, ഞങ്ങളുടെ സഹപ്രവർത്തകർ തെരുവിൽ പോരാട്ടത്തിലാണ്. ബിജെപിയെ തകർത്തു ജനാധിപത്യത്തെ തിരിച്ചുപിടിക്കാനാണ് ആ പോരാട്ടം. മന്ത്രി എം.ബി. രാജേഷിനെതിരെ രൂക്ഷ വിമർനവുമായി വി ടി ബൽറാം

പാലക്കാട്‌ : കെപിസിസി വൈസ് പ്രസിഡന്റും മുൻ എംഎൽഎയുമായ വി.ടി. ബൽറാം, തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷിനെതിരെ സോഷ്യൽ മീഡിയയിൽ ശക്തമായ വിമർശനവുമായി രംഗത്തെത്തി.

ബൽറാം ഫേസ്ബുക്കിൽ കുറിച്ചതിൽ, കോൺഗ്രസ് സോഷ്യൽ മീഡിയ വിഭാഗമായ ഡിഎംസി ചെയർമാൻ സ്ഥാനത്ത് നിന്ന് താൻ മാറിയിട്ടില്ലെന്നും, ചില മാധ്യമങ്ങൾ പ്രചരിപ്പിക്കുന്ന “പദവി ഒഴിഞ്ഞു” എന്ന വാർത്തകൾ അടിസ്ഥാനരഹിതമാണെന്നും വ്യക്തമാക്കി.

സംഘടനാപരമായ ഇടപെടലിന്റെ ഭാഗമായി മാത്രമാണ് വിവാദമായ പോസ്റ്റിൽ തിരുത്തൽ നടത്തിയത് എന്നും അദ്ദേഹം പറഞ്ഞു.

പൗരത്വ നിയമത്തിനെതിരെ നടന്ന സമരകാലത്ത് “ഗോലി മാരോ സാലോൻകോ” വിളിച്ചു കൂട്ടിയ അനുരാഗ് ഠാക്കൂറിനെ തന്റെ ആത്മാർത്ഥ സുഹൃത്തായി പരിചയപ്പെടുത്തിയ ആളാണ് എം.ബി. രാജേഷ് എന്ന് ബൽറാം ആരോപിച്ചു. അതിന്റെ പ്രതികൂലഫലങ്ങൾ ഒഴിവാക്കാനാണ് രാജേഷ് ഇപ്പോഴും വ്യാജ വിവാദങ്ങൾ ഉയർത്തുന്നതെന്നും അദ്ദേഹം അഭിപ്രായപ്പെട്ടു.

ബിഹാറിൽ രാഹുൽ ഗാന്ധിയും തേജസ്വി യാദവും നയിച്ച വോട്ടർ അധികാർ യാത്ര രാജ്യത്ത് വലിയ ജനചലനം സൃഷ്ടിച്ചിട്ടും, അതിനെക്കുറിച്ച് രാജേഷ് പ്രതികരിച്ചിട്ടില്ലെന്ന് ബൽറാം ചൂണ്ടിക്കാട്ടി. വോട്ടു അട്ടിമറി വിഷയത്തിൽ മുഖ്യമന്ത്രി പിണറായി വിജയനും മിണ്ടാത്തതും അദ്ദേഹം വിമർശിച്ചു.

എഴുത്തുകാരൻ ബെന്യാമിനെയോ കോൺഗ്രസ് നേതാവ് വി.എം. സുധീരനെയോതിരെ വ്യക്തിപരമായ ആക്രമണം നടത്തിയിട്ടില്ലെന്നും, അതുസംബന്ധിച്ച രാജേഷിന്റെ ആരോപണങ്ങൾ സത്യവിരുദ്ധമാണെന്നും ബൽറാം വ്യക്തമാക്കി.

വാളയാർ കേസിലും നിയമന വിവാദങ്ങളിലും രാജേഷിന്റെ നിലപാട് ചോദ്യംചെയ്ത അദ്ദേഹം, മരണപ്പെട്ട കുട്ടികളുടെ അമ്മക്കെതിരെ മന്ത്രി നടത്തുന്ന പരാമർശങ്ങൾ അനൗചിത്യവും സത്യപ്രതിജ്ഞാ ലംഘനവുമാണെന്ന് അഭിപ്രായപ്പെട്ടു.

“നിങ്ങൾ ബിഹാറിലേക്ക് ഉറ്റുനോക്കി ഇരിക്കട്ടെ, ഞങ്ങളുടെ സഹപ്രവർത്തകർ തെരുവിൽ പോരാട്ടത്തിലാണ്. ബിജെപിയെ തകർത്തു ജനാധിപത്യത്തെ തിരിച്ചുപിടിക്കാനാണ് ആ പോരാട്ടം” – എന്നാണ് ബൽറാമിന്റെ പ്രതികരണത്തിന്റെ സമാപനം