തദ്ദേശ തെരഞ്ഞെടുപ്പില്‍ വനിതാ സ്ഥനാര്‍ഥികള്‍ നേട്ടം ഉണ്ടാക്കുമോ ? വിനിതാ വാര്‍ഡുകള്‍ ഇക്കുറി കോട്ടയം ജില്ലയുടെ ഭാവി നിര്‍ണയിക്കും. ജില്ലയില്‍ പകുതിയിലേറെ സീറ്റുകളില്‍ മത്സരിക്കുന്നതു വനിതകള്‍. യുവ വനിതാ സ്ഥാനാര്‍ഥികള്‍ മത്സരിക്കുന്ന വാര്‍ഡുകളില്‍ പോരാട്ടം കടുക്കുന്നു

കോട്ടയം: വനിതകളെ നിര്‍ത്തിയതു ഗുണം ചെയ്യുമോ... തദ്ദേശ തെരഞ്ഞെടുപ്പില്‍ സ്ഥാനാര്‍ഥികളുടെ അന്തിമ ചിത്രം തെളിഞ്ഞപ്പോള്‍ ജില്ലയില്‍ വനികള്‍ക്കാണു ഭൂരിപക്ഷം. 

മൂന്നു മുന്നണികളും വനിതാ സ്ഥാനാര്‍ഥികളെ നിര്‍ത്തുന്നതില്‍ പിന്നിലല്ല. 83 പേര്‍ മല്‍സരിക്കുന്ന ജില്ല പഞ്ചായത്തില്‍ 47 പേരും വനിതകളാണ്. 71ല്‍ 60 ഗ്രാമ പഞ്ചായത്തുകളിലും വനിത സ്ഥാനാര്‍ഥികളാണു കൂടുതല്‍. നഗരസഭകളിലെ ആകെ 677 സ്ഥാനാര്‍ഥികളില്‍ 357 പേരും വനിതകളാണ്. 

ബ്ലോക്ക് പഞ്ചായത്ത് സ്ഥാനാര്‍ഥികളുടെ എണ്ണത്തില്‍ പുരുഷന്മാരാണു മുന്നില്‍. 489ല്‍ 237 പേരാണു വനിത സ്ഥാനാര്‍ഥികള്‍. 

ഏറ്റവും കൂടുതല്‍ വനിതകള്‍ മത്സരിക്കുന്ന തദ്ദേശസ്ഥാപനം കോട്ടയം നഗരസഭയാണ്, 178ല്‍ 89 വനിതകള്‍. ചങ്ങനാശേരി (135ല്‍ 79), ഏറ്റുമാനൂര്‍ (124ല്‍ 65), വൈക്കം (91ല്‍ 51) നഗരസഭകളിലും സ്ത്രീകളാണു മുന്നില്‍.

വനിതകളുടെ സാന്നിധ്യം തെരഞ്ഞെടുപ്പില്‍ നിര്‍ണായകമാകുമെന്നു മുന്നണികള്‍ കരുതുന്നു.. വിദ്യാര്‍ഥികള്‍, ഹരിത കര്‍മ്മ സേനാംഗങ്ങള്‍, മാധ്യമ പ്രവര്‍ത്തകര്‍, അഭിഭാഷകര്‍ തുടങ്ങി വിവിധ മേഖലകളില്‍ കഴിവു തെളിയിച്ചവര്‍ ഇക്കുറി മത്സര രംഗത്തുണ്ട്. 

കഴിഞ്ഞ തവണത്തെ അപേക്ഷിച്ച് ഇക്കുറി മത്സരിക്കുന്ന യുവതികളുടെ എണ്ണം കൂടുതലാണ്. കഴിവുള്ള യുവാക്കളെ ഉയര്‍ത്തിക്കൊണ്ടു വരണമെന്നായിരുന്നു പാര്‍ട്ടികള്‍ താഴെ തട്ടിലേക്കു നല്‍കിയ നിര്‍ദേശം.

യുവ സ്ഥനാര്‍ഥികള്‍ പ്രചാരണം ശക്തമാക്കുമ്പോള്‍ മുതര്‍ന്നവര്‍ അവരോട് പിടിച്ചു നില്‍ക്കാന്‍ പാടുപെടുന്നുണ്ട്. യുവ വോട്ടര്‍മാരുടെ എണ്ണം കൂടി എന്നതിനാലാണിത്. 

മുതിര്‍ന്നവര്‍ക്കു വൈബില്ലെന്നാണ് യുവ വോട്ടര്‍മാര്‍ പറയുന്നത്. ഇതോടെ യുവ വനിതാ സ്ഥാനാര്‍ഥികള്‍ നില്‍ക്കുന്ന വാര്‍ഡില്‍ വന്‍ പോരാട്ടമാണ് നടക്കുന്നത്. 

പലര്‍ക്കും വാര്‍ഡുകളില്‍ സ്ഥിരം മുഖങ്ങളോട് താല്‍പര്യമില്ല. വര്‍ഷങ്ങായി ഒരേ ആള്‍ക്കു വോട്ടു ചെയ്യുന്നു.. എന്നിട്ടും വാര്‍ഡില്‍ കാര്യമായ വികസനമില്ല. ഇക്കുറി മാറ്റി പരീക്ഷിക്കാമെന്നു കരുതുന്നവര്‍ ഏറെ. 

സ്ഥിരം ജയിക്കുന്ന പല സ്ഥാനാര്‍ഥികളെയും അട്ടിമറിക്കാന്‍ പുതുമുഖങ്ങളെയാണു മുന്നണികള്‍ വാര്‍ഡുകളില്‍ ഇറക്കിയിരിക്കുന്നത്. യു.ഡി.എഫിലും ഇക്കുറി യുവാക്കള്‍ക്കു വലിയ പ്രാധാന്യം ലഭിച്ചു. കെ.എസ്.യു പ്രവര്‍ത്തകരെ പോലും സ്ഥാനാര്‍ഥിയായി കോണ്‍ഗ്രസ് നിര്‍ത്തിയിട്ടുണ്ട്.