ഇ20 ഇന്ധനം പണി തന്നു തുടങ്ങി മക്കളേ. ഇ20 ഇന്ധനത്തിന്റെ ഉപയോഗം മൂലം എന്‍ജിന്‍ പണിയടക്കം അറ്റകുറ്റപ്പണിക്കു വരുന്ന വാഹനങ്ങളുടെ എണ്ണം വര്‍ധിച്ചുവെന്നു വര്‍ക്‌ഷോപ്പ് ഉടമകള്‍. 2022-ലോ അതിനുമുമ്പോ വാങ്ങിയ പെട്രോള്‍ വാഹനങ്ങളുള്ള 52 ശതമാനം അറ്റകുറ്റപ്പണി നടത്തേണ്ടിവരന്നു

കോട്ടയം: ഇ20 ഇന്ധനം പണി തന്നു തുടങ്ങി മക്കളേ. ഇ20 ഇന്ധനത്തിന്റെ ഉപയോഗം മൂലം എന്‍ജിന്‍ പണിയടക്കം അറ്റകുറ്റപ്പണിക്കു വരുന്ന വാഹനങ്ങളുടെ എണ്ണം വര്‍ധിച്ചുവെന്നു വര്‍ക്‌ഷോപ്പ് ഉടമകള്‍. മൈലേജ് കുറയുന്നതു മാത്രമല്ല, 2022-ലോ അതിനുമുമ്പോ വാങ്ങിയ പെട്രോള്‍ വാഹനങ്ങളുള്ള 52 ശതമാനം ഉടമകളും അവരുടെ വാഹനത്തിന് ഈ വര്‍ഷം അസാധാരണമായ തോതില്‍ അറ്റകുറ്റപ്പണി നടത്തേണ്ടിവന്നുവെന്നു പറയുന്നു. 

പണി കിട്ടുന്നതോ എന്‍ജിന്‍, പെട്രോള്‍ ലൈന്‍, ടാങ്ക്, കാര്‍ബ്യുറേറ്റര്‍ തുടങ്ങിയ പ്രധാന ഭാഗങ്ങള്‍ക്കും.  മുൻപ് ഇത്തരം അറ്റകുറ്റപ്പണി വന്നിരുന്നത് 28 ശതമാനമായിരുന്നെങ്കില്‍ ഇപ്പോൾ ഇത് ഏകദേശം ഇരട്ടിയായിട്ടുണ്ട്.

കാറുകള്‍ സ്റ്റാര്‍ട്ട് ആകുന്നില്ല എന്നത് മുതല്‍ ചെലവേറിയ എന്‍ജിന്‍ തകരാര്‍ വരെ സംഭവിച്ചുവെന്ന് നിരവധി ഉപയോക്താക്കള്‍ ഓണ്‍ലൈനില്‍ പങ്കുവെച്ച തങ്ങളുടെ അനുഭവങ്ങളില്‍ പറയുന്നു.  ഉപയോക്താക്കള്‍ മാത്രമല്ല, മെക്കാനിക്കുകളും ഇക്കാര്യം സാക്ഷ്യപ്പെടുത്തുന്നുണ്ട്. ഇന്ധന സംബന്ധമായ പ്രശ്നങ്ങളില്‍ 40 ശതമാനം വര്‍ധനവ് ഉണ്ടായെന്ന് വിവിധ നഗരങ്ങളിലെ മെക്കാനിക്കുകള്‍ 'ലോക്കല്‍ സര്‍ക്കിള്‍സ്' സര്‍വേയില്‍ പറയുന്നു. ഫ്യുവല്‍ ഇന്‍ജക്ടര്‍ തകരാറുകള്‍, ടാങ്കില്‍ തുരുമ്പ് പിടിക്കല്‍ തുടങ്ങിയ പ്രശ്‌നങ്ങളും മെക്കാനിക്കുകള്‍ റിപ്പോര്‍ട്ട് ചെയ്തിട്ടുണ്ട്.

ജിഎസ്ടി 2.0 യാഥാര്‍ത്ഥ്യമായതോടെ  വലിയ ആവേശം സൃഷ്ടിച്ച മേഖലയാണു വാഹന വില്‍പ്പനയുടേത്. കേരളത്തില്‍ ഉള്‍പ്പെടെ കാര്‍ വാങ്ങുന്നവരുടെ എണ്ണത്തില്‍ ഗണ്യമായ വര്‍ദ്ധനവുണ്ട്. പഴയ കാര്‍ കിട്ടുന്ന വിലയ്ക്കു വിറ്റൊഴിവാക്കാനാണ് പലരും ശ്രമിക്കുന്നത്. ഇതോടെ യൂസ്ഡ് കാര്‍ വിപണിയില്‍ ഉണര്‍വ് സംഭവിച്ചിട്ടുണ്ട്. പുതിയ വാഹനങ്ങളുടെ വില കുറഞ്ഞിട്ടും അത് വാങ്ങാന്‍ സാമ്പത്തികമായി കഴിയാത്തവര്‍ അനുബന്ധ മേഖലയായ യൂസ്ഡ് കാര്‍ വില്‍പ്പനയെ വലിയതോതില്‍ ഉപയോഗപ്പെടുത്തുന്നുണ്ടെന്നു ഈ രംഗത്ത് പ്രവര്‍ത്തിക്കുന്നവര്‍ പറയുന്നു. യൂസ്ഡ് കാറുകള്‍ക്ക് ഇഎംഐ സൗകര്യം ലഭിക്കുമെന്നതും ചെറിയ കുടുംബങ്ങള്‍ പോലും കാര്‍ വാങ്ങാന്‍ കാരണമായിട്ടുണ്ട.

എന്നാല്‍ യൂസ്ഡ് കാറുകള്‍ വാങ്ങുമ്പോള്‍ ചില പ്രശ്നങ്ങളുണ്ടാകാനും സാദ്ധ്യത കൂടുതലാണ്. വാഹനത്തിന്റെ കാലപ്പഴക്കം, പുതിയ ഫീച്ചറുകളുടെ ലഭ്യതയില്ലായ്മ, വാറന്റി കാലാവധി കുറവായിരിക്കും, വാഹനം എത്തരത്തില്‍ ഉപയോഗിച്ചതാണെന്ന് അറിയാന്‍ കഴിയില്ല തുടങ്ങിയവയാണവ.