ഫ്രാഞ്ചൈസിയെന്ന് തെറ്റിദ്ധരിപ്പിച്ച് ഓണ്‍ലൈന്‍ ട്രേഡിങ്ങിന്റെ മറവില്‍ തട്ടിപ്പ്. 45 ലക്ഷം തട്ടിയ യുവതി റിമാന്‍ഡില്‍

തിരുവനന്തപുരം: ഓണ്‍ലൈന്‍ ട്രേഡിങിലൂടെ 45 ലക്ഷം തട്ടിയെടുത്ത കേസില്‍ യുവതി അറസ്റ്റില്‍. പാലക്കാട് കൊല്ലങ്കോട് സ്വദേശിനി ഹിത കൃഷ്ണയാണ് (30) പിടിയിലായത്. ആറ്റിങ്ങല്‍ ഇടയ്‌ക്കോട് സ്വദേശിയായ കിരണ്‍ കുമാറില്‍ നിന്ന് പണം തട്ടിയ കേസിലാണ് അറസ്റ്റ്. 

കൊച്ചിയില്‍ പ്രവര്‍ത്തിക്കുന്ന അക്യൂമെന്‍ ക്യാപിറ്റല്‍ മാര്‍ക്കറ്റ് ഇന്ത്യ ലിമിറ്റഡ് എന്ന ട്രേഡിങ് സ്ഥാപനത്തിന്റെ ഫ്രാഞ്ചൈസിയാണെന്ന് വിശ്വസിപ്പിച്ചായിരുന്നു തട്ടിപ്പ്. 2022 ഏപ്രില്‍ 30ന് പരാതിക്കാരന്റെ ആറ്റിങ്ങലിലെ വീട്ടില്‍ വച്ച് ഓണ്‍ലൈന്‍ ട്രേഡിങിന്റെ ഡെമോ കാണിച്ച ശേഷം ലാഭമുണ്ടാക്കാമെന്ന് വിശ്വസിപ്പിച്ചാണ് ബാങ്ക് അക്കൌണ്ട് വഴി പണം വാങ്ങിയത്. 

എന്നാല്‍ പണം നഷ്ടപ്പെട്ട വിവരം മനസിലായതോടെ കിരണ്‍ കുമാര്‍ ആറ്റിങ്ങല്‍ പൊലീസില്‍ പരാതി നല്‍കി. പിന്നാലെ ഒളിവില്‍പ്പോയ പ്രതി തിരുവനന്തപുരം ജില്ലാ കോടതിയിലും ഹൈക്കോടതിയിലും ജാമ്യത്തിന് ശ്രമിച്ചെങ്കിലും ജാമ്യം നിഷേധിച്ചതോടെ വിവിധ സംസ്ഥാനങ്ങളിലെ സുഹൃത്തുക്കളോടൊപ്പം കഴിയുകയായിരുന്നു.  

കേരളത്തില്‍  എത്തിയ വിവരം ലഭിച്ച പൊലീസ്, എറണാകുളത്ത് നിന്നും ഹിതയെ അറസ്റ്റ് ചെയ്യുകയായിരുന്നു. ഹിത തട്ടിപ്പിലൂടെ നേടിയ പണം ഉപയോഗിച്ച് ആഡംബര ജീവിതം നയിക്കുകയായിരുന്നെന്ന് പൊലീസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.