ജന്മനാടായ പെരുമ്പാവൂരില്‍ പഞ്ചാരിമേളത്തില്‍ വിസ്മയം തീര്‍ത്ത് നടന്‍ ജയറാം

പെരുമ്പാവൂര്‍: ജന്മനാടായ പെരുമ്പാവൂരില്‍ പഞ്ചാരിമേളത്തില്‍ വിസ്മയം തീര്‍ത്ത് നടന്‍ ജയറാം. പെരുമ്പാവൂര്‍ ശ്രീധര്‍മശാസ്താ ക്ഷേത്രത്തിലാണ് ചമയങ്ങളും നാട്യങ്ങളുമില്ലാതെ എത്തി താരം മേളം അവതരിപ്പിച്ചത്.

പെരുമ്പാവൂര്‍ ശ്രീധര്‍മശാസ്താ ക്ഷേത്രത്തിലെ വലിയവിളക്ക് ആഘോഷത്തിന്റെ ഭാഗമായി നടന്ന ശ്രീബലി എഴുന്നള്ളിപ്പിനാണ് സിനിമാതാരം ജയറാം അവതരിപ്പിച്ച പഞ്ചാരിമേളം അകമ്പടി ആയത്.

ഇലത്താളവും കൊമ്പും കുഴലുമായി നൂറോളം വരുന്ന മേള കലാകാരന്മാര്‍ ഇടംതലയും വലംതലയുമായി ജയറാമിന് ഒപ്പം ചേര്‍ന്നു. പതികാലത്തില്‍ തുടങ്ങിയ പഞ്ചാരിമേളം അഞ്ചാംകാലത്തില്‍ മേളപ്പെരുക്കത്തോടെ കലാശിച്ചപ്പോള്‍ മേള ആസ്വാദകര്‍ക്കും നിര്‍വൃതിയായി.

ജയറാമിനെ കാണാനും മേളം ആസ്വദിക്കുവാനും നൂറുകണക്കിന് ആസ്വാദകരാണ് ശ്രീ ധര്‍മശാസ്താ ക്ഷേത്രത്തിലേക്ക് എത്തിച്ചേര്‍ന്നത്.