അയോധ്യയും കാശിയും കാണാൻ പ്രവാസി എക്സ്പ്രസ്; വരാനിരിക്കുന്ന പ്രവാസി ദിനത്തിൽ കേന്ദ്ര സർക്കാരിൻ്റെ പുതിയ പ്രഖ്യാപനങ്ങളുണ്ടാകും ; പ്രവാസി മലയാളികളടക്കമുള്ളവരെ ലക്ഷ്യമിട്ടുള്ള നീക്കവുമായി മോദി സർക്കാർ

ഡൽഹി: പ്രവാസികൾക്കായി കേന്ദ്ര സർക്കാർ സമർപ്പിച്ച 'പ്രവാസി ഭാരതീയ എക്സ്പ്രസ്' വിജയകരമായി സർവീസ് തുടരുന്നു. ഭാരതത്തിന്റെ ആത്മീയ തലസ്ഥാനമായ കാശിയും പുണ്യഭൂമിയായ അയോധ്യയും ഉൾപ്പെടെയുള്ള ചരിത്രപ്രധാനമായ ഇടങ്ങളിലേക്ക് പ്രവാസികൾക്കായി മാത്രം ഒരുക്കിയ ഈ സവിശേഷ യാത്ര ഇതിനോടകം നിരവധി പ്രവാസി കുടുംബങ്ങൾക്ക് മറക്കാനാവാത്ത അനുഭവമായി മാറിക്കഴിഞ്ഞു.

പൈതൃക പാതയിലൂടെ ഒരു വർഷം
നരേന്ദ്ര മോദി സർക്കാരിന്റെ 'പ്രവാസി തീർത്ഥ ദർശൻ യോജന'യുടെ ഭാഗമായി ആരംഭിച്ച ഈ ട്രെയിൻ സർവീസ് കഴിഞ്ഞ വർഷം മുതലാണ് പൂർണ്ണമായി പ്രവർത്തനസജ്ജമായത്. കേവലം ഒരു വിനോദസഞ്ചാര പദ്ധതിയെന്നതിലുപരി, ഭാരതീയ പൈതൃകത്തെ ലോകമെമ്പാടുമുള്ള ഇന്ത്യൻ വംശജരുമായി ബന്ധിപ്പിക്കുന്ന സാംസ്കാരിക പാലമായാണ് ഈ ട്രെയിൻ പ്രവർത്തിക്കുന്നത്. വിദേശങ്ങളിൽ ജനിച്ച് വളരുന്ന രണ്ടാം തലമുറയിലെ മലയാളി യുവാക്കൾ അടക്കമുള്ളവർക്ക് ഭാരതത്തിന്റെ ചരിത്രവും ആത്മീയ പ്രൗഢിയും നേരിട്ട് അനുഭവിച്ചറിയാൻ ഈ സർവീസ് അവസരമൊരുക്കി.

 അയോധ്യയിലെ ശ്രീരാമക്ഷേത്ര ദർശനവും വാരണാസിയിലെ കാശീ വിശ്വനാഥ ക്ഷേത്രവും ഗംഗാ ആരതിയും പ്രവാസികൾക്ക് വൈകാരികമായ അനുഭവങ്ങളാണ് സമ്മാനിച്ചത്. അന്താരാഷ്ട്ര നിലവാരത്തിലുള്ള ഭക്ഷണവും സുരക്ഷയും താമസ സൗകര്യങ്ങളും ഐ.ആർ.സി.ടി.സി ഈ ട്രെയിനിൽ  ഉറപ്പാക്കിയത് ഏറെ  ആശ്വാസമായി.

പല മലയാളി കുടുംബങ്ങളും തങ്ങളുടെ യാത്രാനുഭവങ്ങൾ 'ചലോ ഇന്ത്യ' ഹാഷ്‌ടാഗിലൂടെ സോഷ്യൽ മീഡിയയിൽ പങ്കുവെച്ചത് പദ്ധതിക്ക് ആഗോളതലത്തിൽ വലിയ പ്രചാരണം നൽകി.

2026-ലെ പ്രവാസി ഭാരതീയ ദിവസിൽ കേന്ദ്ര സർക്കാർ പ്രവാസികൾക്കായി എന്ത് പുതിയ പദ്ധതികളാകും പ്രഖ്യാപിക്കുക എന്ന ആകാംക്ഷയിലാണ് പ്രവാസി സമൂഹം. നിലവിലുള്ള തീർത്ഥാടന സർവീസുകൾ കൂടുതൽ നഗരങ്ങളിലേക്ക് വ്യാപിപ്പിക്കുമെന്നും ദക്ഷിണേന്ത്യയിലെ പൈതൃക കേന്ദ്രങ്ങളെ ബന്ധിപ്പിച്ചു കൊണ്ട് പുതിയ റൂട്ടുകൾ പ്രഖ്യാപിക്കുമെന്നും പ്രതീക്ഷിക്കപ്പെടുന്നു.

2026-ലെ പ്രവാസി ഭാരതീയ ദിനത്തോടനുബന്ധിച്ച് പ്രഖ്യാപിക്കാനിരിക്കുന്ന പുതിയ പരിഷ്കാരങ്ങളിലൂടെ പ്രവാസി സേവനങ്ങൾ കൂടുതൽ സുഗമമാക്കുമെന്നാണ് വിദേശകാര്യ മന്ത്രാലയത്തിൽ നിന്നുള്ള വിവരം. ഡിജിറ്റൽ പാസ്‌പോർട്ട് സേവനങ്ങൾ മുതൽ പ്രവാസി നിക്ഷേപങ്ങൾക്കുള്ള ലളിതമായ നടപടിക്രമങ്ങൾ വരെ ഈ വർഷത്തെ അജണ്ടയിൽ ഇടം പിടിക്കാൻ സാധ്യതയുണ്ട്