കടൽ കടന്ന കരുത്ത്; 3.5 കോടി പ്രവാസികളുടെ സ്വപ്നങ്ങൾക്ക് ചിറകുനൽകി രാജ്യം ; വികസിത ഭാരതം എന്ന ലക്ഷ്യത്തിലേക്കുള്ള പ്രയാണത്തിൽ പ്രവാസി സമൂഹത്തെ പങ്കാളികളാക്കുക എന്ന ലക്ഷ്യത്തോടെ വമ്പൻ പ്രഖ്യാപനങ്ങൾക്കൊരുങ്ങി കേന്ദ്ര സർക്കാർ

ഡൽഹി :ലോകത്തിലെ ഏറ്റവും വലിയ പ്രവാസി സമൂഹത്തെ പ്രതിനിധീകരിക്കുന്ന രാഷ്ട്രമെന്ന നിലയിൽ  ഇന്ത്യ  ഇന്ന് ആഗോളതലത്തിൽ ശ്രദ്ധാകേന്ദ്രമാണ്. 2024-ലെ ഐക്യരാഷ്ട്രസഭയുടെ കണക്കുകൾ പ്രകാരം ഏകദേശം 3.5 കോടിയിലധികം ഇന്ത്യക്കാർ വിവിധ വിദേശ രാജ്യങ്ങളിൽ വസിക്കുന്നുണ്ട്. ഈ ബൃഹത്തായ ജനവിഭാഗത്തെ മാതൃരാജ്യവുമായി വൈകാരികമായും സാമ്പത്തികമായും ബന്ധിപ്പിക്കുന്ന ഔദ്യോഗിക പ്ലാറ്റ്‌ഫോമാണ് പ്രവാസി ഭാരതീയ ദിവസ് . വികസിത ഭാരതം എന്ന ലക്ഷ്യത്തിലേക്കുള്ള പ്രയാണത്തിൽ പ്രവാസി സമൂഹത്തെ പങ്കാളികളാക്കുക എന്നതാണ് ഇതിന്റെ പ്രധാന ലക്ഷ്യം.
2003-ൽ അന്നത്തെ പ്രധാനമന്ത്രി അടൽ ബിഹാരി വാജ്‌പേയിയാണ് പ്രവാസി ഭാരതീയ ദിവസിന് ഔദ്യോഗികമായി തുടക്കമിട്ടത്.

ലക്ഷ്മി മാൾ സിങ്‌വി കമ്മറ്റിയുടെ ശുപാർശ പ്രകാരം രൂപംകൊണ്ട ഈ പദ്ധതിക്ക് പിന്നിൽ കൃത്യമായ ചരിത്രപരമായ പശ്ചാത്തലമുണ്ട്. 1915 ജനുവരി 9-ന് മഹാത്മാഗാന്ധി ദക്ഷിണാഫ്രിക്കയിൽ നിന്ന് ഇന്ത്യയിൽ തിരിച്ചെത്തിയ ദിനത്തിന്റെ സ്മരണാർത്ഥമാണ് ജനുവരി 9 ഈ സംഗമത്തിനായി തിരഞ്ഞെടുത്തത്. 2003-ൽ കേവലം 2,000 പ്രതിനിധികളുമായി ആരംഭിച്ച ഈ സംഗമം, 2025-ൽ ഭുവനേശ്വറിൽ നടന്ന കൺവെൻഷനിൽ എത്തിയപ്പോൾ 100-ലധികം രാജ്യങ്ങളിൽ നിന്നായി 10,000-ത്തോളം പ്രതിനിധികളുടെ പങ്കാളിത്തം കൊണ്ട് ശ്രദ്ധേയമായി.

പ്രവാസി ഭാരതീയ ദിവസ് പോലുള്ള സംരംഭങ്ങൾ ഇന്ത്യയുടെ സാമ്പത്തിക രംഗത്ത് വലിയ സ്വാധീനം ചെലുത്തുന്നുണ്ട്. ലോകബാങ്ക് റിപ്പോർട്ടുകൾ പ്രകാരം 2024-25 സാമ്പത്തിക വർഷത്തിൽ ഇന്ത്യയിലെത്തിയ പ്രവാസി വരുമാനം ഏകദേശം 125 ബില്യൺ ഡോളർ കടന്നു. ഇതിൽ 21 ശതമാനത്തോളം കേരളത്തിലേക്കാണ് എത്തുന്നത് എന്നത് മലയാളികളുടെ സാമ്പത്തിക കരുത്ത് വ്യക്തമാക്കുന്നു. ഇന്ത്യയുടെ മൊത്തം ആഭ്യന്തര ഉത്പാദനത്തിന്റെ (ജി.ഡി.പി ) ഏകദേശം 3.3% പ്രവാസി വരുമാനമാണെങ്കിൽ, കേരളത്തിന്റെ കാര്യത്തിൽ ഇത് സംസ്ഥാന ജി.ഡി.പിയുടെ ഏകദേശം 25 ശതമാനത്തിന് മുകളിലാണ്.

പ്രവാസികൾക്ക് നൽകുന്ന ഏറ്റവും ഉയർന്ന ബഹുമതിയായ പ്രവാസി ഭാരതീയ സമ്മാനിലെ മലയാളി പ്രാതിനിധ്യവും ശ്രദ്ധേയമാണ്. ഇതുവരെ നൽകപ്പെട്ട 330-ഓളം പുരസ്കാരങ്ങളിൽ 45-ലധികം മലയാളികൾ (ഏകദേശം 13.6%) ഉൾപ്പെടുന്നു. കഴിഞ്ഞ വർഷത്തെ നേട്ടങ്ങളിൽ യു.എ.ഇയിൽ നിന്നുള്ള രാമകൃഷ്ണൻ ശിവസ്വാമി അയ്യരും കിർഗിസ്ഥാനിൽ നിന്നുള്ള ഡോ. പ്രേം കുമാറും ഇടംപിടിച്ചു. ലോജിസ്റ്റിക്സ് മേഖലയിൽ അന്താരാഷ്ട്ര വ്യാപാര ബന്ധങ്ങൾ ശക്തിപ്പെടുത്തിയ രാമകൃഷ്ണൻ അയ്യരും, മധ്യേഷ്യയിലെ ഇന്ത്യൻ മെഡിക്കൽ വിദ്യാർത്ഥികളുടെ ക്ഷേമത്തിനായി പ്രവർത്തിക്കുന്ന ഡോ. പ്രേം കുമാറും ആഗോളതലത്തിൽ കേരളത്തിന്റെ യശസ്സുയർത്തി.

പ്രവാസികളുടെ ക്ഷേമം മുൻനിർത്തി ഒട്ടനവധി പദ്ധതികളാണ് ഈ പ്ലാറ്റ്‌ഫോമിലൂടെ നടപ്പിലാക്കിയിട്ടുള്ളത്. 45 ലക്ഷം പേർക്ക് ആനുകൂല്യം നൽകുന്ന ഒ.സി.ഐ കാർഡ്, സുരക്ഷിതമായ കുടിയേറ്റം ഉറപ്പാക്കുന്ന ഇ-മൈഗ്രേറ്റ് , 90 ശതമാനം പരാതി പരിഹാര നിരക്കുള്ള മദദ്  പോർട്ടൽ, പൈതൃക ടൂറിസം പ്രോത്സാഹിപ്പിക്കുന്ന പ്രവാസി എക്സ്പ്രസ് എന്നിവ ഇതിൽ പ്രധാനമാണ്. 2026-ലെ കൺവെൻഷനിലേക്ക് പ്രവേശിക്കുമ്പോൾ, 2047-ഓടെ ഇന്ത്യയെ ഒരു വികസിത രാഷ്ട്രമാക്കുന്നതിൽ  പ്രവാസികളുടെ പങ്ക് നിർണ്ണായകമാണെന്ന് ഈ സ്ഥിതിവിവരക്കണക്കുകൾ ശരിവെക്കുന്നു. അതുകൊണ്ട് തന്നെ വികസിത ഭാരതം എന്ന ലക്ഷ്യത്തിനായി പ്രവാസി സമൂഹത്തെ ഒപ്പം നിർത്താനുള്ള പ്രഖ്യാപനങ്ങളും കേന്ദ്ര സർക്കാരിൻ്റെ ഭാഗത്ത് നിന്നുമുണ്ടാകും