കൊച്ചി: ട്രെയിന്‍ യാത്രക്കാര്‍ക്ക് ഒരു സന്തോഷ വാര്‍ത്ത. കേരളത്തിലെ ട്രെയിനുകള്‍ക്ക് വേഗത കൂടും. എറണാകുളം - ഷൊര്‍ണൂര്‍ റൂട്ടില്‍ ആധുനിക സിഗ്‌നലിംഗ് സംവിധാനം സ്ഥാപിക്കുന്നതുമായി ബന്ധപ്പെട്ട പ്രവൃത്തി അവസാന ഘട്ടത്തിലേയ്ക്ക് കടന്നിരിക്കുകയാണ്. ഈ റൂട്ടിലുള്ള റെയില്‍വേ ട്രാക്കിലെ വളവുകള്‍ നിവര്‍ത്തുക കൂടി ചെയ്യുന്നതോടെ ട്രെയിനുകള്‍ക്ക് നിലവിലുള്ളതിനേക്കാള്‍ വേഗത കൈവരിക്കാന്‍ സാധിക്കും.
മണിക്കൂറില്‍ 160 കിലോമീറ്റര്‍ വരെ വേഗതയില്‍ ഓടാന്‍ കഴിയുന്ന വന്ദേ ഭാരത് ട്രെയിനുകള്‍ ഉള്‍പ്പെടെ ഈ റീച്ചില്‍ 80 കിലോമീറ്റര്‍ വരെ, അതായത് പകുതി വേഗതയിലാണ് സര്‍വീസ് നടത്തുന്നത്. ഒട്ടേറെ വളവുകളുള്ള എറണാകുളം - ഷൊര്‍ണൂര്‍ പാതയില്‍ ട്രെയിനുകള്‍ക്ക് 80 കിലോമീറ്ററിനപ്പുറത്തേയ്ക്ക് വേഗമെടുക്കാന്‍ കഴിയാത്ത സ്ഥിതിയാണ് നിലവിലുള്ളത്.
പുതിയ സിഗ്‌നലിംഗ് സംവിധാനം സ്ഥാപിക്കുകയും ഈ റീച്ചിലെ വളവുകള്‍ നിവര്‍ത്തുകയും ചെയ്യുന്നതോടെ ഈ റൂട്ടിലും ട്രെയിനുകളുടെ വേഗത കൂട്ടാന്‍ സാധിക്കും. മാത്രമല്ല, എറണാകുളം - ഷൊര്‍ണൂര്‍ റൂട്ടിലെ മൂന്നാം പാതയുടെ ഡിപിആര്‍ തയ്യാറായി കഴിഞ്ഞതായാണ് റിപ്പോര്‍ട്ട്. മണിക്കൂറില്‍ 160 കിലോമീറ്റര്‍ വരെ വേഗത്തില്‍ ട്രെയിന്‍ ഓടിക്കാന്‍ സാധിക്കുന്ന മൂന്നാം പാതയാണ് പദ്ധതിയിലുള്ളത്.
പുതിയ സിഗ്‌നലിംഗ് സംവിധാനം വരുന്നതോടെ എറണാകുളം - ഷൊര്‍ണൂര്‍ റൂട്ടില്‍ കൂടുതല്‍ ട്രെയിനുകള്‍ക്ക് സര്‍വീസ് നടത്താന്‍ സാധിക്കും. ഒരു ട്രെയിന്‍ സ്റ്റേഷനില്‍ നിന്ന് പുറപ്പെട്ട് 8 കിലോമീറ്റര്‍ ദൂരം പിന്നിടുമ്പോഴാണ് അടുത്ത ട്രെയിന്‍ ഇതുവഴി കടത്തിവിടുകയുള്ളൂ.
പുതിയ സിഗ്‌നലിംഗ് സംവിധാന പ്രകാരം ഒരു ട്രെയിന്‍ പുറപ്പെട്ട് 2 കിലോമീറ്റര്‍ പിന്നിട്ടാല്‍ അടുത്ത ട്രെയിനിനെ കടത്തി വിടാന്‍ സാധിക്കും. ഈ സമയ ലാഭം ഉപയോഗിച്ച് കൂടുതല്‍ ട്രെയിനുകള്‍ ഓടിക്കാനും സാധിക്കും.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/GmuMNUkuDQltdWaKB9UJ.jpg)