പാട്രിയറ്റ് വ്യോമ പ്രതിരോധ സംവിധാനങ്ങള്‍ യുക്രെയ്‌നിലേക്ക് അയക്കുമെന്ന് ട്രംപ്

പെന്റഗണ്‍ യുക്രെയ്‌നുള്ള സൈനിക സഹായം പുനരാരംഭിക്കാന്‍ തീരുമാനിച്ചതിന് പിന്നാലെ, കൂടുതല്‍ പാട്രിയറ്റ് വ്യോമ പ്രതിരോധ സംവിധാനങ്ങള്‍ യുക്രെയ്‌നിലേക്ക് അയക്കുമെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. മാധ്യമപ്രവര്‍ത്തകരോട് സംസാരിക്കവെയാണ് ട്രംപ് ഇക്കാര്യം വ്യക്തമാക്കിയത്.

''ഞങ്ങള്‍ അവര്‍ക്ക് പാട്രിയറ്റ് മിസൈലുകള്‍ അയയ്ക്കും, അത് അവര്‍ക്ക് അത്യാവശ്യമാണ്. പുടിന്‍ ഒരുപാട് പേരെ ഞെട്ടിച്ചു. അദ്ദേഹം നന്നായി സംസാരിക്കുന്നു, വൈകുന്നേരമാകുമ്പോള്‍ ബോംബെറിയുന്നു. അവിടെ ഒരു ചെറിയ പ്രശ്‌നമുണ്ട്. എനിക്കത് ഇഷ്ടപ്പെടുന്നില്ല,'' ട്രംപ് പറഞ്ഞു.

പ്രതിരോധ, ആക്രമണ മിസൈലുകള്‍ ഉള്‍പ്പെടുന്ന ഒരു പുതിയ സൈനിക സഹായ പാക്കേജിന് അംഗീകാരം നല്‍കുന്നതിനെക്കുറിച്ച് അമേരിക്ക ആലോചിക്കുന്നതായി നിരവധി മാധ്യമങ്ങള്‍ റിപ്പോര്‍ട്ട് ചെയ്തിരുന്നു. ഇതിന് പിന്നാലെയാണ് ട്രംപിന്റെ ഈ പ്രസ്താവന.