ഖിസ്സ - ജോയ് ഡാനിയേൽ എഡിറ്റ് ചെയ്‌ത രണ്ടാമത്തെ പുസ്‌തകം ഷാർജ അന്താരാഷ്ട്ര പുസ്തകമേളയിൽ പ്രകാശനം ചെയ്യും

സത്യം ഓൺലൈനിലെ 'പ്രവാസത്തിലെ മഞ്ഞുത്തുള്ളികൾ' എന്ന കോളം എഴുതുന്ന ജോയ് ഡാനിയേൽ എഡിറ്റ് ചെയ്‌ത രണ്ടാമത്തെ പുസ്‌തകമായ 'ഖിസ്സ' ഈ വരുന്ന ഷാർജ അന്താരാഷ്ട്ര പുസ്തകമേളയിൽ നവംബർ മൂന്നാം തീയതി രാത്രി ഒമ്പത് മണിക്ക് പ്രകാശനം ചെയ്യുന്നു.

ഈ രണ്ടാംഭാഗത്തിൽ പ്രവാസത്തിലെ ഇരുപത്തിമൂന്ന് എഴുത്തുകാരുടെ ചെറുകഥകൾ ആണ് ഉൾപ്പെടുത്തിയിരിക്കുന്നത്‌. തികച്ചും വ്യത്യസ്തമായ, മനസ്സിനെ ആകർഷിക്കുന്ന കഥകൾ. സന്തോഷവും, സന്താപവും , വിരഹവും, യാത്രയും ഒക്കെ അന്തർലീനമായിക്കിടക്കുന്ന വായനാനുഭവം 'ഖിസ്സ' നൽകുന്നു.

പ്രവാസത്തിലെ സാഹിത്യ സൗഹൃദ കൂട്ടായ്‌മയായ 'മഷി'യാണ് ഈ പുസ്തകത്തിന് പിന്നിൽ. സാപിയൻസ് ലിറ്ററേച്ചർ ആണ് ഖിസ്സയുടെ പ്രസാധകർ. ഓരോ കഥയും തുടങ്ങുന്നത് എഴുത്തുകാരൻറെ കാരിക്കേച്ചറിന് ശേഷമാണ്. കരിക്കേച്ചറുകൾ വരച്ചത് മുനീബ് ഹംസയാണ്.

ഖിസ്സയ്ക്ക് അവതാരിക എഴുതിയിരിക്കുന്നത് പ്രശസ്ത ബ്ലോഗറും 'കൊടകരപുരാണ'ത്തിന്റെ എഴുത്തുകാരനുമായ 'വിശാലമനസ്‌കൻ' സജീവ് എടത്താടൻ.