ഗാസ: അടിയന്തിര ഒ ഐ സി മന്ത്രിതല യോഗം ബുധനാഴ്ച

ജിദ്ദ:  ഫലസ്തീൻ മണ്ണിൽ യുദ്ധാന്തരീക്ഷം നിലനിൽക്കേ അംഗരാഷ്ട്രങ്ങളുടെ അഭ്യർത്ഥന പ്രകാരം അടിയന്തിരമായി ഇസ്ലാമിക രാജ്യങ്ങളുടെ പൊതുവേദിയായ ഓർഗനൈസേഷൻ ഓഫ് ഇസ്ലാമിക് കോ-ഓപ്പറേഷൻ സമ്മേളിക്കുന്നു. 

എക്സിക്യൂട്ടീവ്‌ പദവിയോടെയുള്ള മന്ത്രിതല യോഗമാണ് ബുധനാഴ്ച ( ഒക്ടോ.18) ചേരുന്നത്.  ഗാസയിലെ സംഭവ വികാസങ്ങൾ ചർച്ച ചെയ്യാൻ അടിയന്തര യോഗം വേണമെന്ന്  നിലവിലെ അദ്യക്ഷ പദവി അലങ്കരിക്കുന്ന സൗദി ഭരണാധികാരി സൽമാൻ രാജാവ്, ഇറാൻ, ഇറാഖ് രാജ്യങ്ങൾ തുടങ്ങിയവർ കഴിഞ്ഞ ദിവസങ്ങളിൽ ആവശ്യപ്പെട്ടിരുന്നു.

ഒ ഐ സിയുടെ ആസ്ഥാനമായ  ജിദ്ദയിൽ വെച്ചാണ്  യോഗം.    സംഘടനയുടെ അധ്യക്ഷൻ എന്ന നിലയിൽ സൽമാൻ രാജാവിന്റെ നിർദേശപ്രകാരമാണ്  ബുധനാഴ്ചയിലെ യോഗമെന്ന്  ഇത് സംബന്ധിച്ച പ്രസ്താവന  വ്യക്തമാക്കി.    

ഓർഗനൈസേഷൻ ഓഫ് ഇസ്‌ലാമിക് കോ-ഓപ്പറേഷന്റെ എക്‌സിക്യൂട്ടീവ് കമ്മിറ്റിയുടെ അടിയന്തര മന്ത്രിതല യോഗത്തിലെ അജണ്ട  ഗാസയിലെ സൈനിക സംഘർഷവും  ഗസയുടെ മേൽ നിലനിൽക്കുന്ന ഉപരോധവും ആയിരിക്കും.