/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/mfErznygESkL5Q2v6xvN.jpg)
മനാമ: ടീന്‍ ഇന്ത്യയും മലര്‍വാടി ബഹ്റൈനും ഫ്രന്റ്സ് സോഷ്യല്‍ അസോസിയേഷനുമായി സഹകരിച്ച് 'സമ്മര്‍ഡിലൈറ്റ് സീസണ്‍ ടു' എന്ന പേരില്‍ സംഘടിപ്പിക്കുന്ന അവധിക്കാലക്യാമ്പിന് ആവേശകരമായ തുടക്കം.
കഴിഞ്ഞ ദിവസം ആരംഭിച്ച ക്യാമ്പിന്റെ ഔപചാരികമായ ഉദ്ഘാടനം ഫ്രന്റ്സ് സോഷ്യല്‍ അസോസിയേഷന്‍ വൈസ് പ്രസിഡന്റ് ജമാല്‍ ഇരിങ്ങല്‍ നിര്‍വഹിച്ചു. നല്ല സൗഹൃദങ്ങളാണ് ഏറ്റവും മികച്ച സമ്പത്ത്. പുതിയ കൂട്ടുകാരെ കണ്ടെത്താനും പരസ്പരം അറിയാനും ശ്രമിക്കണം. അറിവ് വര്‍ധിക്കുന്നതും അതിലൂടെ തിരിച്ചറിവുകള്‍ ഉണ്ടാകുന്നതും ഇത്തരം കൂടിച്ചേരലുകളിലൂടെയാണ്. നല്ല മക്കളായി വളരാന്‍ എല്ലാവര്‍ക്കും സാധിക്കട്ടെയെന്നും അദ്ദേഹം പറഞ്ഞു.
ആക്ടിംഗ് പ്രസിഡന്റ് സമീര്‍ ഹസന്‍ അധ്യക്ഷത വഹിച്ചു. മലര്‍വാടി സെക്രട്ടറി ലൂന ഷഫീഖ് സ്വാഗതവും ടീന്‍സ് ഇന്ത്യ സെക്രട്ടറി അനീസ് വി.കെ നന്ദിയും പറഞ്ഞു. ക്യാമ്പ് ഡയരക്ടര്‍ അബ്ദുല്‍ ഹഖ്, ക്യാമ്പ് കോര്‍ഡിനേറ്ററും മോട്ടിവേഷണല്‍ സ്പീക്കറും കൗണ്‍സിലറുമായ എ.എം. ഷാനവാസ് എന്നിവര്‍ കുട്ടികളുമായി സംവദിച്ചു.
ഫ്രന്റ്സ് ആക്ടിംഗ് ജനറല്‍ സെക്രെട്ടറി സക്കീര്‍ ഹുസൈന്‍, ടീന്‍ ഇന്ത്യ കണ്‍വീനര്‍ ഫാത്തിമ സ്വാലിഹ്, കേന്ദ്ര സമിതി അംഗം ഖാലിദ് സി, ടീന്‍ ഇന്ത്യ മനാമ ഏരിയ കണ്‍വീനര്‍ സജീബ്, സാജിര്‍ ഇരിക്കൂര്‍, ഗഫൂര്‍ മൂക്കുതല, മുഹമ്മദ് ഷാജി, ജലീല്‍ തുടങ്ങിയവരും ചടങ്ങില്‍ പങ്കെടുത്തു.
കുട്ടികള്‍ക്ക് വിനോദത്തിലൂടെ വിജ്ഞാനം പകരുക എന്നതാണ് ക്യാമ്പ് കൊണ്ട് ഉദ്ദേശിക്കുന്നത്. ആഗസ്റ്റ് 14 വരെ നീണ്ടുനില്‍ക്കുന്ന ക്യാമ്പില്‍ ഏതാനും സീറ്റുകള്‍ കൂടി ബാക്കിയുണ്ടെന്ന് സംഘാടകര്‍ അറിയിച്ചു. 6 മുതല്‍ 12 വയസ് വരെയുള്ള കുട്ടികള്‍ക്കാണ് ക്യാമ്പില്‍ പങ്കെടുക്കാന്‍ സാധിക്കുക.
നാട്ടില്‍ നിന്നുള്ള പ്രശസ്ത മോട്ടിവേഷനല്‍ ട്രെയിനര്‍മാര്‍, ലൈഫ് കോച്ചുമാര്‍, ചൈല്‍ഡ് സ്‌പെഷലിസ്റ്റുകള്‍, വിവിധ മേഖലകളില്‍ കഴിവ് തെളിയിച്ച ബഹ്റൈനിലെ പ്രമുഖരുമാണ് വ്യത്യസ്ത വിഷയങ്ങള്‍ കൈകാര്യം ചെയ്യുന്നത്. ഗള്‍ഫിലെ അരോചകമാകുന്ന വേനലവധിക്കാലം 'സമ്മര്‍ഡിലൈറ്റിലൂടെ' രസകരവും വിജ്ഞാനപ്രദവുമായ അനുഭവമാക്കി മാറ്റാന്‍ ഒരുങ്ങുകയാണ് ഈ ക്യാമ്പിലൂടെ സംഘാടകര്‍.
നാടന്‍ കളികള്‍, ക്രാഫ്റ്റ്, ഫീല്‍ഡ് ട്രിപ്പ്, അഭിനയം, നൃത്തം, പാട്ട്, കഥ, പരിസ്ഥിതി പഠനം, പരിസര നിരീക്ഷണം, നേതൃ പ്രരിശീലനം, കരിയര്‍ ആന്‍ഡ് ലൈഫ് സ്‌കില്‍സ്, ഹെല്‍ത്ത് ആന്‍ഡ് ഫിറ്റ്‌നസ്, ടീം ബില്‍ഡിങ്, ഡിജിറ്റല്‍ ലിറ്ററസി, എക്‌സ്‌പ്രെസീവ് ആര്‍ട്ട്‌സ്, ടൈം മാനേജ്മെന്റ്, ക്രിയേറ്റിവ് സ്‌കില്‍ എന്‍ഹാന്‍സ്‌മെന്റ്, ടെക്നോളജി ആന്‍ഡ് ഇന്നൊവേഷന്‍സ്, സാമൂഹിക സേവനം, പൊതു പ്രഭാഷണം, യോഗ, വ്യക്തിത്വ വികസനം തുടങ്ങിയ വിഷയങ്ങളിലുള്ള പരിശീലനങ്ങളാണ് സമ്മര്‍ ഡിലൈറ്റില്‍ ഒരുക്കിയിട്ടുള്ളത്.
കലാമല്‍സരങ്ങള്‍, പ്രദര്‍ശനങ്ങള്‍, പ്രൊജക്ട് വര്‍ക്കുകള്‍ തുടങ്ങിയവയും ക്യാമ്പിന്റെ ഭാഗമായുണ്ടാകും. രക്ഷിതാക്കള്‍ക്ക് വേണ്ടി പ്രമുഖര്‍ നയിക്കുന്ന പ്രത്യേക സെഷനുകളും ഇതിന്റെ ഭാഗമായി ഒരുക്കുന്നുണ്ട്. മെന്റര്‍മാരായ റഷീദ ബദറുദ്ദീന്‍, നുസൈബ മൊയ്തീന്‍, ഫസീല ഹാരിസ്, സുആദ ഫാറൂഖ്, നസീല ഷഫീഖ്, ലുലു അബ്ദുല്‍ ഹഖ്, നാസ്നീന്‍ അല്‍ത്താഫ്, നിഷിദ ഫാറൂഖ്, ഫാത്തിമ ഹനാന്‍ എന്നിവരാണ് ക്യാമ്പിന് നേതൃത്വം നല്‍കുന്നത്.
ക്യാമ്പില്‍പങ്കെടുക്കുന്നവര്‍ക്കായി ബഹ്റൈനിലെ വിവിധ ഭാഗങ്ങളില്‍ നിന്നും വാഹനസൗകര്യം ഏര്‍പ്പെടുത്തിയിട്ടുണ്ട്. കൂടുതല്‍ വിവരങ്ങള്‍ക്കും രജിസ്‌ട്രേഷനും ഫോണ്‍: 3373214, 36128530.