തീപിടിത്തം: കോന്നോള്ളി – ദി പോയിന്റ് റൂട്ടിൽ ലുവാസ് റെഡ് ലൈൻ സർവീസ് ഒരാഴ്ചത്തേക്ക് നിർത്തിവച്ചു; ടിക്കറ്റുകൾ ഡബ്ലിൻ ബസിൽ ഉപയോഗിക്കാം

ഡബ്ലിനിലെ ജോർജ് ’സ് ഡോക്കിലുണ്ടായ തീപിടിത്തത്തെ തുടര്‍ന്ന് ലുവാസ് റെഡ് ലൈന്‍ സര്‍വീസുകള്‍ ഭാഗികമായി നിര്‍ത്തിവയ്ക്കുന്നതായി അധികൃതര്‍. കോന്നോള്ളി മുതല്‍ ദി പോയിന്റ് വരെയുള്ള സര്‍വീസുകളാണ് കുറഞ്ഞത് ഏഴ് ദിവസത്തേക്കെങ്കിലും നിര്‍ത്തിവച്ചിരിക്കുന്നതായി ലുവാസ് ഓപ്പറേറ്റര്‍മാരായ ട്രാൻസ്‌ദേവ് അറിയിച്ചിരിക്കുന്നത്.

ഓഗസ്റ്റ് 19-ന് ജോർജ് ’സ് ഡോക്കില്‍ ഉണ്ടായ തീപിടിത്തം ഇവിടെയുള്ള ലുവാസ് റെഡ് ലൈനിന് കാര്യമായ നാശനഷ്ടം ഉണ്ടാക്കിയിരുന്നു. ഗ്യാസ് ലീക്കായതാണ് തീപിടിത്തതിന് കാരണം. ഇതിന് പിന്നാലെയാണ് പാലം അടച്ചത്. ഈ സാഹചര്യത്തില്‍ തള്ളാറ്റ്/സഗ്ഗാർട്ട് – കോന്നോള്ളി റൂട്ടില്‍ മാത്രമാകും നിലവില്‍ സര്‍വീസ് ഉണ്ടാകുക.

പാലം സുരക്ഷാ പരിശോധനകള്‍ക്കും, അറ്റകുറ്റ പണികള്‍ക്കും ശേഷം മാത്രമേ തുറക്കുകയുള്ളൂ എന്നും അധികൃതര്‍ പ്രസ്താവനയില്‍ വ്യക്തമാക്കി. അതുവരെ ലുവാസ് ടിക്കറ്റുകള്‍ ഉപയോഗിച്ച് കോന്നോള്ളി – ദി പോയിന്റ് റൂട്ടിലെ ഡബ്ലിന്‍ ബസില്‍ യാത്ര ചെയ്യാം.