അയർലണ്ടിൽ ഒരു വയസ് തികഞ്ഞ എല്ലാ കുട്ടികൾക്കും സൗജന്യ ചിക്കൻ പോക്സ് വാക്സിൻ നൽകും

അയര്‍ലണ്ടില്‍ 2024 ഒക്ടോബര്‍ 1-ന് ശേഷം ജനിച്ച എല്ലാ കുട്ടികള്‍ക്കും സൗജന്യ ചിക്കന്‍ പോക്‌സ് വാക്‌സിന്‍ നല്‍കുമെന്ന് ഹെൽത്ത്‌ സർവീസ് എക്സിക്യൂട്ടീവ് (എച്ച് എസ് ഇ). 12 മാസം പ്രായമായ എല്ലാ കുട്ടികള്‍ക്കും സൗജന്യമായി വാക്‌സിന്‍ ലഭിക്കും.

ചിക്കന്‍പോക്‌സ് പിടിപെടുന്നത് കുട്ടിക്കാലത്താണ് എന്നതാണ് പൊതുവിലെ ധാരണ എങ്കിലും, 2018-2024 കാലത്ത് ശൈശവത്തിന് ശേഷം ചിക്കന്‍പോക്‌സ് ബാധിച്ച പലകുട്ടികളിലും മെനിങ്ങിറ്റീസ് അല്ലെങ്കില്‍ എൻസ്ഫലിറ്റിസ് ബാധ ഉണ്ടായിരുന്നു. അസുഖം ബാധിച്ച് ആശുപത്രിയില്‍ പ്രവേശിപ്പിക്കപ്പെടുന്നവരുടെ എണ്ണവും വര്‍ദ്ധിച്ചു.

ഈ സാഹചര്യത്തിലാണ് കുട്ടികള്‍ക്ക് സൗജന്യ വാക്‌സിന്‍ നല്‍കാന്‍ അധികൃതര്‍ തയ്യാറായിരിക്കുന്നത്. വാക്‌സിന് ബുക്ക് ചെയ്യാനായി ജിപിയെ സമീപിക്കേണ്ടതാണ്. 2,4,6,12, 13 എന്നീ മാസങ്ങളിലായി നവജാതശിശുക്കളുമായി ജിപിയെ കാണിക്കേണ്ടുണ്ട്. ഓരോ തവണ കാണിക്കുമ്പോഴും ബ്ലൂ ഇമ്യൂണൈസേഷന്‍ പാസ്‌പോര്‍ട്ട് ഉണ്ടെന്നും രക്ഷിതാക്കള്‍ ഉറപ്പാക്കണം.

കൂടുതല്‍ വിവരങ്ങള്‍ക്ക്: https://www.hse.ie/eng/health/immunisation/