ഡബ്ലിനിൽ വമ്പൻ മയക്കുമരുന്ന് വേട്ട; പിടിച്ചെടുത്തത് 21 കിലോ ഹെറോയിൻ

ഡബ്ലിനില്‍ വമ്പന്‍ മയക്കുമരുന്ന് വേട്ട. 21 കിലോഗ്രാം വരുന്ന ഹെറോയിനാണ് ഡബ്ലിനില്‍ നടത്തിയ ഓപ്പറേഷനിലൂടെ പിടിച്ചെടുത്തതെന്ന് ഗാര്‍ഡ വ്യക്തമാക്കി. ഇതിന് ഏകദേശം 3 മില്യണ്‍ യൂറോ വിപണി വില വരും.

Coolock പ്രദേശത്ത് ഒരു വാഹനം പരിശോധിച്ചതില്‍ നിന്നുമാണ് ഗാർഡ നാഷണൽ ഡ്രഗ്സ് ആൻഡ് ഓർഗനൈസ്ഡ് ക്രൈം ബ്യൂറോ വന്‍ അളവിലുള്ള മയക്കുമരുന്ന് പിടികൂടിയത്. സംഭവസ്ഥലത്ത് നിന്നും 30-ലേറെ പ്രായമുള്ള ഒരു പുരുഷനെയും, തുടരന്വേഷണത്തില്‍ 40-ലേറെ പ്രായമുള്ള മറ്റൊരു പുരുഷനെയും അറസ്റ്റ് ചെയ്തിട്ടുമുണ്ട്.

വളരെ മാരകമായ മയക്കുമരുന്നാണ് ഹെറോയിനെന്നും, നിരവധിപേരുടെ മരണത്തിനും, നാശത്തിനും കാരണമാകുന്ന ഹെറോയിന്‍ വിതരണവും വില്‍പ്പനയും നടത്തുന്ന കുറ്റവാളികളെ തടയാന്‍ ശ്രമം തുടരുമെന്നും അസിസ്റ്റന്റ് കമ്മിഷണർ ഫോർ ഓർഗനൈസ്ഡ് ആൻഡ് സീരിസ് ക്രൈം വ്യക്തമാക്കി.