പതിനായിരം യൂറോ തരാം , അയര്‍ലണ്ട് വിട്ടുപോകാമോ പ്ലീസ് ….

ഡബ്ലിന്‍ :അഭയാര്‍ത്ഥി പ്രവാഹം കുറയ്ക്കാന്‍ വോളണ്ടറി റിട്ടേണ്‍ പ്രോഗ്രാം പ്രഖ്യാപിച്ച് അയര്‍ലണ്ട്.ഇതനുസരിച്ച് അന്താരാഷ്ട്ര സംരക്ഷണ അവകാശവാദം ഉപേക്ഷിക്കുന്ന കുടുംബങ്ങള്‍ക്ക് 10,000 യൂറോയാണ് (ഏകദേശം പത്ത് ലക്ഷം രൂപ) സര്‍ക്കാര്‍ ഓഫര്‍ ചെയ്യുന്നത്.ഇതു സംബന്ധിച്ച ഉത്തരവില്‍ ജസ്റ്റിസ് മന്ത്രി ജിം ഒ കല്ലഗന്‍ ഒപ്പുവച്ചു.

സെപ്റ്റംബര്‍ 28ന് മുമ്പ് അയര്‍ലണ്ടില്‍ അഭയം തേടിയവര്‍ക്കും അവരുടെ പദവി സംബന്ധിച്ച തീരുമാനത്തിനായി കാത്തിരിക്കുന്നവര്‍ക്കുമാകും സ്വമേധയാ സ്വന്തം രാജ്യത്തേക്ക് മടങ്ങിപ്പോകുന്നതിന് ഇപ്രകാരമുള്ള ഗ്രാന്റ് ലഭിക്കുക.മൈഗ്രേഷന്‍ സിസ്റ്റത്തിലെ സമ്മര്‍ദ്ദം കുറയ്ക്കുന്നതിന് അഭയം തേടുന്നവര്‍ക്ക് റി ഇന്റഗ്രേഷന്‍ അലവന്‍സ് നല്‍കുമെന്നും ജസ്റ്റിസ് വകുപ്പ് അറിയിച്ചു.കഴിഞ്ഞ സെപ്തംബര്‍ 19 വരെയുള്ള കണക്കനുസരിച്ച് ഈ വര്‍ഷം ഇതുവരെ 1,159 പേര്‍ സ്വമേധയാ അയര്‍ലണ്ട് വിട്ടുപോയതായി വകുപ്പ് പറയുന്നു.കഴിഞ്ഞ വര്‍ഷത്തെ അപേക്ഷിച്ച് 129% വര്‍ദ്ധനവാണിതെന്നും വകുപ്പ് പറയുന്നു.

ഈ പദ്ധതിയനുസരിച്ച് അയര്‍ലണ്ട് വിട്ടുപോകുന്ന ഓരോ അഭയാര്‍ത്ഥിക്കും ഇപ്രകാരമുള്ള ഗ്രാന്റ് അലവന്‍സ് നല്‍കിയാണ് വിമാനം കയറ്റി തിരിച്ചയക്കുന്നത്. ഒരാള്‍ക്ക് 1,200 യൂറോ വരെയും ഒരു കുടുംബത്തിന് 2,000 വരെയും ലഭിക്കുമായിരുന്നു.വിമാനക്കൂലിയും സൗജന്യമാണ്.

വര്‍ദ്ധിപ്പിച്ച പുതിയ നിരക്കനുസരിച്ച് ഇത് യഥാക്രമം 2,500 യൂറോ ,10,000 യൂറോ എന്നിങ്ങനെയാണ് ലഭിക്കുന്നത് .സെപ്തംബര്‍ 28ന് മുമ്പ് അഭയാര്‍ത്ഥിയായവര്‍ക്കും പദവി സംബന്ധിച്ച തീരുമാനത്തിനായി കാത്തിരിക്കുന്നവര്‍ക്കുമാണ് ഇതിന് അര്‍ഹതയുള്ളത്.ചുരുക്കത്തില്‍ അയര്‍ലണ്ടില്‍ വന്ന് അഭയാര്‍ത്ഥിയാകാന്‍ രജിസ്റ്റര്‍ ചെയ്ത ഓരോരുത്തര്‍ക്കും 2,500 യൂറോ സര്‍ക്കാര്‍ കൊടുക്കും.ഭാര്യയും ഭര്‍ത്താവും ചേര്‍ന്നാണ് അഭയാര്‍ത്ഥി കേന്ദ്രത്തില്‍ അഭയം തേടിയതെങ്കില്‍ അവര്‍ക്ക് 10000 യൂറോയാണ് സര്‍ക്കാര്‍ ‘ഇനാം’പ്രഖ്യാപിച്ചിരിക്കുന്നത്!

ഇത്രയും കനത്ത ‘സമ്മാനം’പ്രഖ്യാപിച്ചാലും’ഇവര്‍ മടങ്ങിപോകാനുള്ള സാധ്യത കുറവാണ്.കാരണം അതിലേറെ ആനുകൂല്യമാണ് ,ഇവിടെ തുടര്‍ന്നാല്‍ അവര്‍ക്ക് ലഭിക്കുന്നത്.

രാജ്യത്ത് നിയമപരമായി അഭയാര്‍ത്ഥി പദവി ലഭിക്കാത്തവര്‍ക്കും ഇന്റര്‍നാഷണല്‍ പ്രൊട്ടക്ഷന്‍ അപേക്ഷ പിന്‍വലിച്ചവര്‍ക്കും നിരസിക്കപ്പെട്ടവര്‍ക്കും വോളന്ററി റിട്ടേണ്‍ ലഭിക്കും.ഗുരുതരമായ കുറ്റകൃത്യത്തിന് ശിക്ഷിക്കപ്പെട്ടവര്‍ക്ക് ഈ ഓഫറിന് അര്‍ഹതയില്ല.

കുടിയേറ്റ സംവിധാനത്തെ കാര്യക്ഷമമാക്കുന്നതില്‍ നാടുകടത്തലിന് പ്രധാന പങ്കുണ്ടെന്ന് ധന മന്ത്രി പാസ്‌കല്‍ ഡോണോ പറഞ്ഞു.ഇത് ചെലവേറിയതും ഏറെ സമയമെടുക്കുന്നതുമാണ്.അതിനാല്‍ മറ്റ് വഴികള്‍ നോക്കുകയാണ് മന്ത്രി ഒ കല്ലഗന്‍ ചെയ്യുന്നതെന്നും ഡോണോ അഭിപ്രായപ്പെട്ടു.