അയര്‍ലണ്ട് നീനയിൽ വി. ഔസേപ്പിതാവിന്റെ തിരുനാൾ ഭക്തിസാന്ദ്രമായി ആഘോഷിച്ചു

നീന (കൗണ്ടി ടിപ്പററി): സാർവത്രിക സഭയുടെയും, തൊഴിലാളികളുടെയും മധ്യസ്ഥനായ വി.ഔസേപ്പിതാവിന്റെ മരണത്തിരുന്നാൾ ശനിയാഴ്ച നീന സെന്‍റ് ജോണ്‍സ് ദ ബാപ്പിസ്റ്റ് ചര്‍ച്ച് ടിയോണില്‍ വച്ച് ഭക്തിസാന്ദ്രമായി കൊണ്ടാടി.

ഉച്ചയ്ക്ക് ഒരുമണിക്ക് കുരിശിന്റെ വഴിയോടെ ആരംഭിച്ച്,തുടർന്ന് നൊവേന,ആഘോഷപൂർവമായ തിരുനാൾ കുർബാന,ഊട്ടു നേർച്ച എന്നിവയോടെ തിരുനാൾ കർമ്മങ്ങൾ അവസാനിച്ചു.

നീനാ ഇടവകയിലെ വൈദികരായ ഫാ.റെക്സൻ ചുള്ളിക്കൽ,ഫാ.ജോഫിൻ ജോസ് എന്നിവരുടെ കാർമികത്വത്തിലാണ് തിരുനാൾ കർമങ്ങൾ നടന്നത്.

വിശ്വാസത്തിന്റെയും അനുസരണത്തിന്റെയും പ്രതീകമായ വി.ഔസേപ്പിതാവിന്റെ തിരുനാളിൽ പങ്കെടുത്ത് വിശുദ്ധന്റെ മധ്യസ്ഥതയാൽ അനുഗ്രഹങ്ങൾ പ്രാപിക്കുവാൻ,നീനയിൽ നിന്നും അയർലൻഡിന്റെ വിവിധ ഭാഗങ്ങളിൽ നിന്നും നിരവധിപ്പേർ നീന ടിയോണ്‍ സെന്‍റ് ജോണ്‍സ് ദ ബാപ്പിസ്റ്റ് ചർച്ചിൽ എത്തിച്ചേർന്നു.

റിപ്പോര്‍ട്ട്: ജോബി മാനുവൽ