അയർലണ്ടിൽ വീട്ടിനുള്ളിൽ അമിതശബ്ദം ഉണ്ടാക്കിയാൽ പിഴ എത്ര അടയ്ക്കണമെന്ന് അറിയാമോ ?

ഡബ്ലിൻ :അയർലണ്ടിലെ ശബ്ദ നിയന്ത്രണത്തിനുള്ള നിയമം നല്ല നിലയിൽ മനസ്സിലാക്കിയില്ലെങ്കിൽ പിഴയൊടുക്കി ഗതികേടിലാകും. അധികമാരും അറിയാത്ത ഈ നിയമം ലംഘിച്ച് ശബ്ദ മലിനീകരണമുണ്ടാക്കിയാൽ 6,000 യൂറോ വരെ പിഴ നൽകേണ്ടി വന്നേക്കാം. അയൽക്കാർ വിശ്രമിക്കാനോ ശാന്തമായിരിക്കാനോ ആഗ്രഹിക്കുന്ന സമയത്ത് അമിതമായ ശബ്ദവും ബഹളവും തടയുന്നതിനാണ് ഈ നിയമം പ്രാബല്യത്തിൽ വരുന്നത്.

രാത്രി വൈകിയുള്ള നിയന്ത്രണങ്ങളെക്കുറിച്ച് മിക്കവർക്കും അറിയാം. അതനുസരിച്ച് മിക്ക കുടുംബങ്ങളും രാത്രി 11നും രാവിലെ ഏഴിനുമിടയിൽ ശബ്ദം കുറയ്ക്കാൻ ഏവരും ശ്രദ്ധിക്കും. പക്ഷേ ശനിയാഴ്ചകളിൽ പകൽ സമയത്ത് ബാധകമായ ശബ്ദ നിയന്ത്രണത്തെക്കുറിച്ച് കുറച്ച് പേർക്ക് മാത്രമേ അറിയൂ.

ശനിയാഴ്ചകളിൽ രാവിലെ എട്ടിനും ഉച്ചയ്ക്ക് ഒന്നിനും ഇടയിലാണ് ഇതനുസരിച്ച് വീടുകളിൽ ശബ്ദം നിയന്ത്രിക്കേണ്ടത്. ഉച്ചത്തിലുള്ള സംഗീതം,രാത്രി വൈകിയുള്ള ഒത്തുചേരലുകളിലും മാത്രം ഒതുങ്ങുന്നതല്ല ഈ നിയന്ത്രണങ്ങൾ. നായ്ക്കളുടെ കുരകൾ,വാഷിംഗ് മെഷീനുകളുടെ ഒച്ച, പുല്ലുവെട്ടുന്ന യന്ത്രങ്ങൾ തുടങ്ങിയ സാധാരണ ശബ്ദങ്ങളും ഇവയിൽ ഉൾപ്പെടുന്നു. കെട്ടിടങ്ങൾ നിറഞ്ഞ പ്രദേശങ്ങളിൽ ഈ ശബ്ദം അയൽക്കാരിൽ നിന്നുള്ള പരാതികൾക്ക് കാരണമായേക്കാം. ശബ്ദ  കൗൺസിലുകൾക്ക് അധികാരമുണ്ട്.

നിയന്ത്രണങ്ങൾ പാലിക്കുന്നതിൽ പരാജയപ്പെട്ടാൽ കുടുംബങ്ങൾക്കിത് വലിയ ബാധ്യതയാകും.

ഐറിഷ് പൗരന്മാരിൽ പകുതിയോളം പേർ ഈ നിയന്ത്രണത്തെക്കുറിച്ച് അജ്ഞരാണെന്ന് വിവരം പുറത്തുവന്നിട്ടുണ്ട്.അതിനാൽ ആളുകൾ നടത്തുന്ന സാധാരണ പ്രവർത്തനങ്ങൾക്ക് പിഴകൾ നൽകുന്നത് പതിവായേക്കാമെന്ന് വിദഗ്ദ്ധർ ഓർമ്മിപ്പിക്കുന്നു. ആളുകൾ വീടിനുള്ളിൽ കൂടുതൽ സമയം ചെലവഴിക്കുന്ന ശരത്കാലത്ത് ഈ നിയമത്തിന് ഏറെ പ്രസക്തിയുണ്ട്. പാർട്ടികൾ, ടി വി സംവിധാനങ്ങൾ, കുടുംബ ഒത്തുചേരലുകൾ എന്നിവയൊക്കെ പലപ്പോഴും കൂടുതൽ ശബ്ദമുണ്ടാക്കുന്നതാണ്. ഹസ്‌കികൾ പോലെ വളരെ ശബ്ദമുള്ള നായ്ക്കളുണ്ടെങ്കിൽ അതും പരാതിയ്ക്ക് കാരണമാകും.

അതേ സമയം ശബ്ദം നിയന്ത്രിക്കാനുള്ള ഏറ്റവും ഫലപ്രദമായ മാർഗ്ഗങ്ങളിലൊന്ന് വീടിൻ്റെ ജനാലകൾ നവീകരിക്കുകയെന്നതാണെന്ന് വിദഗ്ദ്ധർ വിശദീകരിക്കുന്നു. ആധുനിക ഗ്ലാസ് സാങ്കേതികവിദ്യയ്ക്ക് വലിയ മാറ്റമുണ്ടാക്കാൻ കഴിയുമെന്ന് വിദഗ്ദ്‌ധർ പറയുന്നു.അക്കൗസ്റ്റിക് ഗ്രേഡ് വിൻഡോ ഇൻസേർട്ടുകൾക്ക് പുറത്തെ ശബ്ദത്തിന്റെ 70% വരെ തടയാൻ കഴിയുമെന്ന് ഇവർ പറയുന്നു.

അയർലണ്ടിലെ അയൽക്കാർ തമ്മിലുള്ള സംഘർഷത്തിനുള്ള ഏറ്റവും സാധാരണമായ കാരണങ്ങളിലൊന്നാണ് ശബ്ദ മലിനീകരണം.പരാതി നൽകിയാൽ കൗൺസിലുകൾ ഇത് അന്വേഷിച്ച് നടപടിയെടുക്കണം. കുടുംബങ്ങൾക്ക് പിഴകൾ നൽകേണ്ടി വരുമെന്ന് മാത്രമല്ല, സമീപത്ത് താമസിക്കുന്നവരുമായുള്ള ബന്ധവും വഷളാകുന്നതിനുമിടയാകുമെന്നും ഇവർ പറയുന്നു

വാഹനത്തിനുള്ളിൽ സ്റ്റീരിയോ സിസ്റ്റം ഉപയോഗിക്കുന്നതിന് നിരോധനമില്ല.പക്ഷെ അതിലൂടെയും അമിതമായ ഒച്ചയുണ്ടാക്കിയാൽ പിഴയൊടുക്കാൻ ഗാർഡയ്ക്കും, കൗൺസിലിനും അധികാരമുണ്ടെന്നും മറക്കേണ്ട...!