കൗണ്ടി ലൂവിലെ വീട്ടിൽ മൂന്ന് പേർ കൊല്ലപ്പെട്ട നിലയിൽ; ചെറുപ്പക്കാരൻ അറസ്റ്റിൽ

കൗണ്ടി ലൂവിലെ വീട്ടില്‍ മൂന്ന് പേര്‍ മരിച്ച നിലയില്‍. ഇന്ന് രാവിലെയാണ് വിവരമറിഞ്ഞ് തള്ളാൻസ്ടൗണിലെ ഒരു വീട്ടില്‍ എത്തിയ ഗാര്‍ഡ, രണ്ട് പുരുഷന്മാരെയും ഒരു സ്ത്രീയെയും മരിച്ച നിലയില്‍ കണ്ടെത്തിയത്.

സംഭവവുമായി ബന്ധപ്പെട്ട് 30-ലേറെ പ്രായമുള്ള ഒരു പുരുഷനെ അറസ്റ്റ് ചെയ്ത് ചോദ്യം ചെയ്തുവരികയാണ്. ഫോറന്‍സിക് പരിശോധനയ്ക്കായി സംഭവസ്ഥലം സീല്‍ ചെയ്തിട്ടുമുണ്ട്.

മൂന്ന് പേരും മരിച്ചത് ആക്രമണത്തിലാണെന്നാണ് ഗാര്‍ഡയുടെ പ്രാഥമിക നിഗമനം. കൊലപാതകത്തിന് കാരണം ഉള്‍പ്പെടെയുള്ള കാര്യങ്ങളില്‍ അന്വേഷണം നടക്കുകയാണ്. സംഭവത്തില്‍ അറസ്റ്റ് ചെയ്യപ്പെട്ടയാള്‍ അല്ലാതെ മറ്റ് പ്രതികള്‍ ഉള്‍പ്പെട്ടിട്ടില്ലെന്നാണ് കരുതുന്നതെന്നും ഗാര്‍ഡ കൂട്ടിച്ചേര്‍ത്തു.