കുവൈറ്റ് എയർവേയ്‌സിന്റെ എയർബസ് A320 സുരക്ഷാ സംവിധാനങ്ങളുടെ നവീകരണം പൂർത്തിയായി

കുവൈറ്റ് സിറ്റി: തങ്ങളുടെ എയർബസ് A320 വിമാനങ്ങളിലെ സുരക്ഷാ സംവിധാനങ്ങളുടെ അപ്ഡേറ്റുകൾ പൂർത്തിയാക്കിയതായി കുവൈറ്റ് എയർവേയ്‌സ് (Kuwait Airways) സ്ഥിരീകരിച്ചു. 

വിമാനത്തിലെ സോഫ്റ്റ്‌വെയർ സംവിധാനങ്ങൾ പുനഃക്രമീകരിക്കാൻ നിർദ്ദേശിക്കുന്ന എയർബസിന്റെ ഏറ്റവും പുതിയ സാങ്കേതിക അറിയിപ്പ് (ടെക്നിക്കൽ ബുള്ളറ്റിൻ) പ്രകാരമുള്ള എല്ലാ ശുപാർശകളും പൂർണമായി പാലിച്ചതായി എയർലൈൻ വ്യക്തമാക്കി.

എയർബസ് നൽകിയ നിർദ്ദേശങ്ങൾക്കനുസൃതമായി, ഡയറക്ടറേറ്റ് ജനറൽ ഓഫ് സിവിൽ ഏവിയേഷനുമായി (DGCA) സഹകരിച്ചാണ് സാങ്കേതിക ടീമുകൾ എയർബസ് A320 വിമാനങ്ങളുടെ മുഴുവൻ ശ്രേണിയിലും ആവശ്യമായ എല്ലാ അപ്ഡേറ്റുകളും വിജയകരമായി പൂർത്തിയാക്കിയത്.

സുരക്ഷയുടെയും പ്രവർത്തനക്ഷമതയുടെയും ഏറ്റവും ഉയർന്ന നിലവാരം ഉറപ്പാക്കുന്നതിനുള്ള തങ്ങളുടെ ശക്തമായ പ്രതിബദ്ധതയാണ് ഈ നടപടികളിലൂടെ പ്രതിഫലിക്കുന്നതെന്ന് കുവൈറ്റ് എയർവേയ്‌സ് ഊന്നിപ്പറഞ്ഞു.

യാത്രക്കാരുടെയും വിമാനങ്ങളുടെയും സുരക്ഷയ്ക്കാണ് കമ്പനി മുൻഗണന നൽകുന്നത്. ആഗോള വ്യോമയാന മാനദണ്ഡങ്ങൾ പാലിക്കുന്നതിനും സുരക്ഷയിലും ഗുണനിലവാരത്തിലും മികച്ച നിലവാരം നിലനിർത്തുന്നതിനും വേണ്ടി കുവൈറ്റ് എയർവേയ്‌സ് നിരന്തരം പ്രവർത്തിക്കുന്നുണ്ടെന്നും പ്രസ്താവനയിൽ കൂട്ടിച്ചേർത്തു. 

ദേശീയ വിമാനക്കമ്പനിക്ക് വേണ്ടിയുള്ള ആവശ്യമായ സിസ്റ്റം അപ്ഡേറ്റുകൾ വിമാനങ്ങളുടെ സുരക്ഷ ഉറപ്പാക്കുന്നതിനായി എല്ലാ മുൻകരുതൽ നടപടികളും ശ്രദ്ധാപൂർവ്വം നിരീക്ഷിച്ച് കൃത്യ സമയത്ത് തന്നെ നടപ്പിലാക്കിയതായും കുവൈറ്റ് എയർവേയ്‌സ് ആവർത്തിച്ചുറപ്പിച്ചു.