മാതാവിനെ കഴുത്തറുത്ത് കൊന്ന കേസ്: പ്രതി ലഹരിക്കേസിൽ ഉൾപ്പെട്ടയാൾ

കുവൈത്ത് സിറ്റി: സാദ് അൽ-അബ്ദുല്ലയിൽ സ്വന്തം അമ്മയെ കഴുത്തറുത്ത് കൊന്ന കേസിൽ കുവൈത്ത് സ്വദേശി യുവാവിനെ പോലീസ് അറസ്റ്റ് ചെയ്തു. 

ഈ ഞെട്ടിക്കുന്ന കൊലപാതകത്തിൻ്റെ കാരണം ഇതുവരെ വ്യക്തമല്ലെന്ന് അധികൃതർ അറിയിച്ചു.

സംഭവസമയത്ത് വീട്ടിലുണ്ടായിരുന്ന മകൾ പരിക്കേറ്റ അമ്മയെ ഉടൻതന്നെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. 

പ്രതിയായ യുവാവ്, ആശുപത്രിയിൽ ചികിത്സ തേടിയെത്തിയപ്പോഴാണ് സുരക്ഷാ ഉദ്യോഗസ്ഥരുടെ പിടിയിലായത്. അറസ്റ്റ് ചെയ്യുമ്പോൾ, കൊലപാതകത്തിന് ഉപയോഗിച്ച രക്തം പുരണ്ട കത്തി ഇയാളുടെ കൈവശം ഉണ്ടായിരുന്നു.

പോലീസ് പ്രതിയെ ചോദ്യം ചെയ്യലിനായി പ്രാദേശിക പോലീസ് സ്റ്റേഷനിലേക്ക് കൊണ്ടുപോയി. കേസ് കൂടുതൽ അന്വേഷണങ്ങൾക്കായി പബ്ലിക് പ്രോസിക്യൂഷന് കൈമാറി. 

പ്രാദേശിക സമൂഹത്തെ ഞെട്ടിച്ച ഈ ക്രൂരമായ കൊലപാതകത്തിൻ്റെ കാരണം പോലീസ് ഇതുവരെ പുറത്തുവിട്ടിട്ടില്ല. പ്രതി ലഹരിയുമായി ബന്ധപ്പെട്ട കേസിൽ മുമ്പും ഉൾപ്പെട്ടിട്ടുണ്ടെന്ന് റിപ്പോർട്ടുകൾ സൂചിപ്പിക്കുന്നു.