റമദാൻ ആദ്യ പകുതിയിൽ തണുപ്പ് തുടരും; കട്ടി കുറഞ്ഞ ശീതകാല വസ്ത്രങ്ങൾ ധരിക്കാമെന്ന് കാലാവസ്ഥാ വിദഗ്ധൻ

കുവൈറ്റ് സിറ്റി: വരാനിരിക്കുന്ന റമദാൻ മാസത്തിന്റെ ആദ്യ പത്ത് ദിവസങ്ങളിൽ രാജ്യത്ത് തണുപ്പുള്ള കാലാവസ്ഥ തുടരുമെന്ന് പ്രമുഖ കാലാവസ്ഥാ നിരീക്ഷകൻ ഈസ റമദാൻ അറിയിച്ചു. 

റമദാൻ പകുതി വരെ രാത്രികാലങ്ങളിൽ തണുപ്പ് അനുഭവപ്പെടാൻ സാധ്യതയുള്ളതിനാൽ വെൽവെറ്റ് വസ്ത്രങ്ങൾ ഉൾപ്പെടെയുള്ളവ ധരിക്കാൻ അനുയോജ്യമായ സമയമായിരിക്കുമിതെന്ന് അദ്ദേഹം വ്യക്തമാക്കി.

നിലവിലെ കാലാവസ്ഥാ മാറ്റം കണക്കിലെടുത്ത് ശീതകാല വസ്ത്രങ്ങൾ പൂർണ്ണമായും മാറ്റിവെക്കേണ്ടതില്ലെന്ന് അദ്ദേഹം ജനങ്ങളെ ഓർമ്മിപ്പിച്ചു. 

എന്നാൽ കഠിനമായ തണുപ്പില്ലാത്തതിനാൽ വളരെ കട്ടിയുള്ള വസ്ത്രങ്ങൾക്ക് പകരം ലഘുവായ ശീതകാല വസ്ത്രങ്ങൾ (Light Winter Wear) തിരഞ്ഞെടുക്കുന്നതാണ് ഉചിതം. 

വസ്ത്രധാരണത്തിന്റെ കാര്യത്തിൽ ആശങ്കപ്പെടേണ്ടതില്ലെന്നും രാത്രിയിൽ നിലനിൽക്കുന്ന സുഖകരമായ തണുപ്പിന് അനുസരിച്ചുള്ള വസ്ത്രങ്ങൾ ധരിക്കാമെന്നും അദ്ദേഹം  പറഞ്ഞു.