കുവൈറ്റിലെ ആകാശപരിധി താൽക്കാലികമായി അടച്ചതിനെത്തുടർന്ന് വിമാനത്താവളത്തിൽ കുടുങ്ങിപ്പോയ ഇന്ത്യൻ പൗരന്മാരുടെ സുരക്ഷയും സൗകര്യങ്ങളും ഉറപ്പാക്കാൻ ഇന്ത്യൻ എംബസി സജ്ജം

കുവൈറ്റ് സിറ്റി: കുവൈറ്റിലെ ആകാശപരിധി താൽക്കാലികമായി അടച്ചതിനെത്തുടർന്ന് വിമാനത്താവളത്തിൽ കുടുങ്ങിപ്പോയ ഇന്ത്യൻ പൗരന്മാരുടെ സുരക്ഷയും സൗകര്യങ്ങളും ഉറപ്പാക്കാൻ കുവൈറ്റിലെ ഇന്ത്യൻ എംബസി അധികൃതർ സജീവമായി രംഗത്തുണ്ട്. 

പ്രതിസന്ധിയിലായ യാത്രക്കാരുമായി എംബസി ഉദ്യോഗസ്ഥർ നിരന്തരം സമ്പർക്കം പുലർത്തുകയും അവർക്ക് ആവശ്യമായ എല്ലാ സഹായങ്ങളും നൽകി വരികയുമാണ്.

യാത്രക്കാരുടെ താമസം, ഭക്ഷണം തുടങ്ങിയ കാര്യങ്ങളിൽ കൃത്യമായ മേൽനോട്ടം വഹിക്കുന്നതിനായി ബന്ധപ്പെട്ട പ്രാദേശിക അധികാരികളുമായും എയർലൈൻ പ്രതിനിധികളുമായും എംബസി ചർച്ചകൾ നടത്തിവരുന്നു. 

യാത്രക്കാർ നിലവിൽ താമസിക്കുന്ന ഹോട്ടലുകളിലെ മാനേജ്‌മെന്റുമായി ബന്ധപ്പെട്ട് അവരുടെ ക്ഷേമം ഉറപ്പാക്കുന്നുണ്ട്. എത്രയും വേഗം യാത്ര പുനരാരംഭിക്കുന്നതിനും പ്രതിസന്ധി പരിഹരിക്കുന്നതിനുമായി എംബസി അധികൃതർ നിരന്തരമായ ഇടപെടലുകൾ നടത്തിവരികയാണെന്ന് എംബസി വൃത്തങ്ങൾ അറിയിച്ചു.