കുവൈറ്റിൽ സുരക്ഷാ പരിശോധന ശക്തമാക്കി: 145 പേർ അറസ്റ്റിൽ, ആയിരക്കണക്കിന് ഗതാഗത നിയമലംഘനങ്ങൾ

കുവൈറ്റ് സിറ്റി: കുവൈറ്റിൽ  സുരക്ഷാ പരിശോധനകളിൽ 145 പേരെ അറസ്റ്റ് ചെയ്യുകയും 3,675 ഗതാഗത നിയമലംഘനങ്ങൾ കണ്ടെത്തുകയും ചെയ്തതായി ജനറൽ ഡിപ്പാർട്ട്‌മെന്റ് ഓഫ് എമർജൻസി പോലീസ് അറിയിച്ചു. രാജ്യത്തുടനീളം 1,441 സുരക്ഷാ ഓപ്പറേഷനുകളാണ് പോലീസ് നടത്തിയത്.

സുരക്ഷാ നടപടികൾ:

പരിശോധനകളിൽ പിടികിട്ടാപ്പുള്ളികളായ 145 പേരെയാണ് അറസ്റ്റ് ചെയ്തത്. ഇതിൽ തിരിച്ചറിയൽ രേഖകളില്ലാതെ കഴിഞ്ഞിരുന്ന 60 പേരും, താമസരേഖകൾക്ക് കാലാവധി കഴിഞ്ഞ 73 പേരും ഉൾപ്പെടുന്നു. 

കോടതി ഉത്തരവുകളുണ്ടായിരുന്ന 59 വാഹനങ്ങളും ഈ ദിവസങ്ങളിൽ പിടിച്ചെടുത്തു. കൂടാതെ, 7 സംഘർഷങ്ങൾ പരിഹരിക്കുകയും 426 പേർക്ക് പോലീസ് സഹായം നൽകുകയും ചെയ്തു.

ഗതാഗത നിയമലംഘനങ്ങൾ:

ഗതാഗത മേഖലയിൽ 3,675 നിയമലംഘനങ്ങളാണ് രേഖപ്പെടുത്തിയത്. ഭിന്നശേഷിക്കാർക്കായുള്ള പാർക്കിംഗ് സ്ഥലങ്ങളിൽ അനധികൃതമായി വാഹനം നിർത്തിയിട്ടതിന് 6 കേസുകൾ രജിസ്റ്റർ ചെയ്തു. 

ഏഴ് വാഹനങ്ങൾ പിടിച്ചെടുക്കുകയും 126 വാഹനാപകടങ്ങളിലും ഒരു ഹിറ്റ് ആൻഡ് റൺ കേസിലും പോലീസ് നടപടികൾ സ്വീകരിക്കുകയും ചെയ്തു.

രാജ്യത്ത് ക്രമസമാധാനവും സുരക്ഷയും ഉറപ്പാക്കുന്നതിന്റെ ഭാഗമായി ഇത്തരം പരിശോധനകൾ തുടരുമെന്ന് അധികൃതർ വ്യക്തമാക്കി.