കുവൈറ്റിൽ നിർമ്മാണ സൈറ്റുകളിൽ സുരക്ഷാ പരിശോധനകൾ ശക്തമാക്കി മുനിസിപ്പാലിറ്റി

കുവൈറ്റ് സിറ്റി: രാജ്യത്തെ നിർമ്മാണ സൈറ്റുകളിൽ, പ്രത്യേകിച്ച് റെസിഡൻഷ്യൽ,  മേഖലകളിൽ, ആരോഗ്യ-സുരക്ഷാ മാനദണ്ഡങ്ങൾ ഉറപ്പാക്കാൻ കുവൈറ്റ് മുനിസിപ്പാലിറ്റി പരിശോധനകൾ ശക്തമാക്കി. 

അപകടങ്ങൾ ഒഴിവാക്കുന്നതിനും തൊഴിലാളികളുടെയും പൊതുജനങ്ങളുടെയും സുരക്ഷ ഉറപ്പാക്കുന്നതിനും ലക്ഷ്യമിട്ടാണ് ഈ നടപടി.

ഹവല്ലി ഗവർണറേറ്റിലെ ഇൻസ്പെക്ഷൻ ടീം മേധാവി അബ്ദുൾറഹ്മാൻ അൽ-റാഷിദ് പറയുന്നതനുസരിച്ച്, നിയമം അനുശാസിക്കുന്ന പ്രധാന സുരക്ഷാ മാനദണ്ഡങ്ങൾ പാലിക്കുന്നുണ്ടോയെന്ന് ഉറപ്പാക്കുകയാണ് പരിശോധനകളുടെ പ്രധാന ലക്ഷ്യം. 

നിർമ്മാണ സൈറ്റുകൾക്ക് ചുറ്റും വേലി കെട്ടുക, താൽക്കാലികമായി താങ്ങായി ഉപയോഗിക്കുന്ന മരക്കമ്പികൾക്ക് പകരം ഇരുമ്പ് തൂണുകൾ ഉപയോഗിക്കുക തുടങ്ങിയ നിർദ്ദേശങ്ങൾ കർശനമായി പാലിക്കാൻ കെട്ടിടനിർമ്മാതാക്കളോട് ആവശ്യപ്പെട്ടിട്ടുണ്ട്.

പരിശോധനകളുടെ പ്രധാന ലക്ഷ്യം അവബോധം വർദ്ധിപ്പിക്കുക എന്നതാണ്. നിയമലംഘനങ്ങൾക്ക് പിഴ ചുമത്തുന്നതിനേക്കാൾ കൂടുതൽ മുന്നറിയിപ്പുകളാണ് മുനിസിപ്പാലിറ്റി നൽകുന്നത്. 

ഏതെങ്കിലും തരത്തിലുള്ള സുരക്ഷാ പ്രശ്നങ്ങൾ കണ്ടെത്തിയാൽ, അത് പരിഹരിക്കാൻ കരാറുകാർക്ക് 72 മണിക്കൂർ സമയം അനുവദിക്കും. മിക്ക നിർമ്മാണ കമ്പനികളും ഈ നിർദ്ദേശങ്ങളോട് സഹകരിക്കുന്നുണ്ടെന്നും അൽ-റാഷിദ് കൂട്ടിച്ചേർത്തു.

അടുത്തിടെ നടത്തിയ ഒരു പരിശോധനാ പര്യടനത്തിൽ 68 മുന്നറിയിപ്പുകളും ഒരു നിയമലംഘനവും രേഖപ്പെടുത്തി. 

നിർമ്മാണ പ്രവർത്തനങ്ങൾ ആരംഭിക്കുന്നതിന് ആവശ്യമായ എല്ലാ പെർമിറ്റുകളും നേടിയിരിക്കണം എന്ന് അൽ-റാഷിദ് ഓർമ്മിപ്പിച്ചു. 

കൂടാതെ, കരാറുകാരും പൊതുജനങ്ങളും സുരക്ഷാ മാനദണ്ഡങ്ങൾ കർശനമായി പാലിക്കണമെന്ന് അദ്ദേഹം അഭ്യർത്ഥിച്ചു.

ഈ നടപടികളിലൂടെ നിർമ്മാണ മേഖലയിലെ സുരക്ഷ ഉറപ്പാക്കാനും അപകടങ്ങൾ കുറയ്ക്കാനും സാധിക്കുമെന്നാണ് കുവൈറ്റ് മുനിസിപ്പാലിറ്റി പ്രതീക്ഷിക്കുന്നത്.