ജീവകാരുണ്യ ചാരിറ്റി പ്രവർത്തനങ്ങളുടെ നിയന്ത്രണം: കുവൈറ്റിൽ പുതിയ നിയമത്തിന്റെ കരട് അംഗീകരിച്ചു

കുവൈറ്റ് സിറ്റി: കുവൈറ്റിൽ ജീവ കാരുണ്യ , ചാരിറ്റി പ്രവർത്തനങ്ങൾ നിയന്ത്രിക്കുന്നതിനുള്ള ഒരു പുതിയ നിയമത്തിന്റെ കരട് അംഗീകരിച്ചു. 

ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ-യൂസഫ് സൗദ് അൽ-സബാഹിന്റെ അധ്യക്ഷതയിൽ ചേർന്ന ജീവകാരുണ്യ ചാരിറ്റി പ്രവർത്തനങ്ങൾ നിയന്ത്രിക്കുന്നതിനുള്ള സമിതിയുടെ ആറാം യോഗത്തിലാണ് ഈ നിർണായക തീരുമാനം ഉണ്ടായത്.

കുവൈറ്റിലെ മാനുഷിക, ചാരിറ്റി പ്രവർത്തനങ്ങൾ കൂടുതൽ കാര്യക്ഷമമാക്കുന്നതിനും അവയെ ഉയർന്ന അന്താരാഷ്ട്ര നിലവാരത്തിലേക്ക് ഉയർത്തുന്നതിനുമുള്ള രാജ്യത്തിന്റെ നിരന്തരമായ ശ്രമങ്ങളുടെ ഭാഗമായാണ് ഈ പുതിയ നിയമനിർമ്മാണം. 

നിലവിലുള്ള നിയമപരമായ ചട്ടക്കൂട് ആധുനികവൽക്കരിക്കുക, മികച്ച ഭരണനിർവഹണം പ്രോത്സാഹിപ്പിക്കുക, സുതാര്യതയും ഫലപ്രാപ്തിയും ഉറപ്പാക്കുക എന്നിവയാണ് ഈ നിയമത്തിന്റെ പ്രധാന ലക്ഷ്യങ്ങൾ.

ഈ നിയമം പ്രാബല്യത്തിൽ വരുന്നതോടെ, പ്രാദേശികമായും അന്തർദേശീയമായും ദുരിതമനുഭവിക്കുന്ന സമൂഹങ്ങളെ സഹായിക്കുന്നതിനും ജീവ കാരുണ്യ , ചാരിറ്റി സംരംഭങ്ങളെ വികസിപ്പിക്കുന്നതിനും കുവൈറ്റ് പ്രതിജ്ഞാബദ്ധമാണെന്ന് ഒരിക്കൽക്കൂടി തെളിയിക്കപ്പെടും. 

ചാരിറ്റി പ്രവർത്തനങ്ങളിൽ ഉയർന്ന നിലവാരമുള്ള സുതാര്യതയും ഉത്തരവാദിത്തവും ഉറപ്പാക്കാനും അതുവഴി ഈ മേഖലയുടെ വിശ്വാസ്യത വർദ്ധിപ്പിക്കാനും പുതിയ നിയമം സഹായിക്കുമെന്ന് പ്രതീക്ഷിക്കുന്നു.