കുവൈത്തിൽ ജനസംഖ്യ കുറഞ്ഞതായി റിപ്പോർട്ട്; വിദേശികളുടെ എണ്ണത്തിൽ ഇടിവ്, കുവൈത്ത് പൗരന്മാരുടെ എണ്ണം വർധിച്ചു

കുവൈത്ത് സിറ്റി : രാജ്യത്തെ ജനസംഖ്യയിൽ കുറവ് രേഖപ്പെടുത്തിയതായി സെൻട്രൽ സ്റ്റാറ്റിസ്റ്റിക്സ് ബ്യൂറോയുടെ കണക്കുകൾ. 2024-ൽ 4,913,271 ആയിരുന്ന മൊത്തം ജനസംഖ്യ 2025-ൽ 4,881,254 ആയി കുറഞ്ഞു. ഇത് 0.65% കുറവാണ്.

ഈ ജനസംഖ്യാ കുറവിന് പ്രധാന കാരണം വിദേശികളുടെ എണ്ണത്തിലുണ്ടായ കുറവാണ്. 2024-ലെ കണക്കനുസരിച്ച് 3,367,490 ആയിരുന്ന വിദേശികളുടെ എണ്ണം 2025-ൽ 3,315,086 ആയി കുറഞ്ഞു. 1.56% കുറവാണ് രേഖപ്പെടുത്തിയത്.

എന്നാൽ, കുവൈത്ത് പൗരന്മാരുടെ എണ്ണം 1.32% വർധിച്ച് 1,545,781-ൽ നിന്ന് 1,566,168 ആയി ഉയർന്നു. ഇത് മൊത്തം ജനസംഖ്യയിൽ കുവൈത്തികളുടെ ശതമാനം 31.5-ൽ നിന്ന് 32.1% ആയി വർധിപ്പിച്ചു. ഉയർന്ന ജനനനിരക്കും സർക്കാർ നയങ്ങളും കാരണമാണ് കുവൈത്തികളുടെ എണ്ണത്തിൽ വർധനവുണ്ടായത്.

ലിംഗാനുപാതത്തിൽ പുരുഷന്മാരുടെ എണ്ണം 1.1% കുറഞ്ഞപ്പോൾ, സ്ത്രീകളുടെ എണ്ണം ഏതാണ്ട് മാറ്റമില്ലാതെ തുടർന്നു. മൊത്തം ജനസംഖ്യയുടെ 68% ഇപ്പോഴും വിദേശികളാണ്. എങ്കിലും, ഈ അനുപാതം ക്രമേണ കുറഞ്ഞുവരുന്നുണ്ട്.

കൂടുതൽ വിദേശ തൊഴിലാളികളുടെ കുടിയേറ്റം ശ്രദ്ധാപൂർവം നിരീക്ഷിക്കണമെന്നും പൗരന്മാർക്ക് ആവശ്യമായ സേവനങ്ങൾക്കായി ആസൂത്രണം നടത്തണമെന്നും റിപ്പോർട്ട് ശുപാർശ ചെയ്യുന്നു.