കുവൈത്തിൽ പുതിയ നിയമം: എക്‌സ്‌ചേഞ്ച് കമ്പനികൾ എല്ലാ കൈമാറ്റ ഇൻവോയ്‌സുകളും ബാങ്കുകൾക്ക് കൈമാറണം

കുവൈത്ത് സിറ്റി: കുവൈത്തിലെ എക്‌സ്‌ചേഞ്ച് കമ്പനികൾ സാമ്പത്തിക കൈമാറ്റങ്ങൾക്ക് ഉപയോഗിക്കുന്ന എല്ലാ ഇൻവോയ്‌സുകളും ബാങ്കുകൾക്ക് കൈമാറണമെന്ന് കുവൈത്ത് സെൻട്രൽ ബാങ്കിന്റെ പുതിയ നിർദ്ദേശം.

കള്ളപ്പണം വെളുപ്പിക്കൽ, ഭീകരവാദ ഫണ്ടിംഗ് എന്നിവ തടയുന്നതിനുള്ള ആഗോള നിയമങ്ങൾ പാലിക്കുന്നതിന്റെ ഭാഗമായാണ് ഈ നടപടി.

പുതിയ നിയമപ്രകാരം, ബാങ്ക് ഫണ്ടുകൾ ഉപയോഗിച്ച് ഡോളർ വാങ്ങുന്ന എല്ലാ ഇടപാടുകളുടെയും വിശദാംശങ്ങൾ കൃത്യമായി രേഖപ്പെടുത്തുകയും ബാങ്കുകൾക്ക് നൽകുകയും വേണം. ഈ ഡോളറുകൾ നിയമപരമായ ബിസിനസ് ഇടപാടുകൾക്ക് മാത്രമാണ് ഉപയോഗിക്കുന്നതെന്ന് ഉറപ്പാക്കുകയാണ് പ്രധാന ലക്ഷ്യം. ഊഹക്കച്ചവടങ്ങൾക്കോ മറ്റ് നിക്ഷേപങ്ങൾക്കോ ഡോളർ ഉപയോഗിക്കുന്നത് തടയാനും ഇത് ലക്ഷ്യമിടുന്നു.

ചില ബാങ്കുകൾ ഇതിനകം തന്നെ ഈ പുതിയ നിയമം നടപ്പാക്കാൻ തുടങ്ങിയിട്ടുണ്ട്. സെൻട്രൽ ബാങ്കിന്റെ ഓഡിറ്റുകളിൽ നിന്ന് സുരക്ഷിതമാകാൻ ഇത് സഹായിക്കുമെന്നാണ് അവരുടെ വിലയിരുത്തൽ. ഈ നിയമം പാലിക്കാത്ത എക്‌സ്‌ചേഞ്ച് കമ്പനികൾക്ക് ബാങ്കുകൾ ഡോളർ വിതരണം നിർത്തിവെക്കുമെന്നും മുന്നറിയിപ്പുണ്ട്.

2026 ഫെബ്രുവരിയിൽ നടക്കാനിരിക്കുന്ന ഫിനാൻഷ്യൽ ആക്ഷൻ ടാസ്ക് ഫോഴ്സിന്റെ (FATF) വിലയിരുത്തലിന് മുന്നോടിയായിട്ടാണ് കുവൈത്ത് ഈ നിയന്ത്രണങ്ങൾ കർശനമാക്കുന്നത്. രാജ്യത്തിന്റെ സാമ്പത്തിക ഭദ്രത ഉറപ്പാക്കുന്നതിനും അന്താരാഷ്ട്ര തലത്തിലുള്ള നിയമങ്ങൾ പാലിക്കുന്നതിനും ഈ നടപടികൾ സഹായിക്കുമെന്നാണ് വിലയിരുത്തൽ.